Tulai i le moliaga lona lua o le fasioti tagata faamoemoeina

I le mae‘a ai ona faamautu o le faasalaga e nofo falepuipui i le olaga atoa i Tafaigata, lea na faalauiloa i le faaiuga o le vaiaso na tea nei, ae o lea foi ua toe tulai i luma o le Faamasinoga Maualuga i lenei vaiaso le alii o Leifiifi ma Amerika Samoa, le alii o Patrick Crichton i se isi foi moliaga o le fasioti tagata faamoemoeina.

O le faaiuga o le vaiaso na tea nei lea na faasala ai Crichton i le soloatoa i le toese i Tafaigata ona o le faamaonia ai o le moliaga o le fasioti tagata faamoemoeina lea na faia faasaga ia te ia ina ua maliu ai se alii avetaavale mai Pesega o Ete Faiumu Numia Ete.

O le faalavelave lea na tulai mai ia Oketopa o le tausaga na tea nei lea na faasala ai Crichton ae o le faalavelave mulimuli ane ia Tesema o le tausaga lava na tea nei, lea faatoa tulai ai i le faamsinoga maualuga i lenei vaiaso.

O le mataupu fou lenei na mafua mai le maliu ai o se alii e iai sona pito Samoa na malaga mai e tafao i le faaiuga o le tausaga ae maua atu lona tino ua maliu i totonu o le toese i Tafaigata. Sa iai le manatu o le Matagaluega o Leoleo e pei ona faasalalau muamua faapea o le alii o Hans Dalton e foliga na pule lava ia i lona ola.

O se vevesi na tulai mai i le taulaga na taofia ai Dalton e le Soifua maloloina ma o iina na avane ai loa lea taulealea i le Ofisa o Leoleo.

O se alii e iai se gasegase faalemafaufau e fai ma aafia ai ma na masalomia le lē toe inu o fualaau a lenei alii na tulai mai ai loa le pisapisao ma na ave e leoleo i Tafaigata e taofia ai ae uma ane ua uma ai ma lona ola.

O le alii lea o Crichton sa ta‘ua e leoleo sa potu faatasi ma Dalton i le avatu ai o ia i le toese ma o Crichton foi la lea ua tuua‘ia ma molia i le maliu o le alii mai i Niu Sila. O Dalton e maua atu ua malemo mai i se tasi o kalone vai i fafo o potu taofia i le  falepuipui i Tafaigata.

E lei iai se tali a Crichton ua faia i luma o le Faamasinoga Maualuga ae o lea ua toe tolopo le mataupu i le masina o Aperila ma ua iai le tuutuuga e oo atu i lea taimi ua mafai ona aumai se tali a lenei alii i le moliaga e pei ona tulai ai nei.

E lei mafai ona tuu atu sana tali i le vaiaso lenei peitai o loo iai foi le masalosaloga o loo tau saili se loia a lenei alii mo lea mataupu lea la ua toe tuu atu i ai Aperila mo le faamautu mai ai o se tali a Crichton i le moliaga fou o le fasioti tagata faamoemoeina.