Tulaga alii & usitai poloaiga a le atua

Ia avea pea lenei avanoa taua e ofoofo alofa atu ai i le mamalu o le atunuu pele Samoa. Poo fea lava le vaega o le kelope o e maua mai ai lenei tusitusiga, ou te faatalofa atu i le agaga faaaloalo tele. Malo le folau i lena vaiaso ua tuanai atu. Tatou siitia le suafa o lesu lo tatou alii ma lo tatou faaola, aua o le suafa lea ua mafai ai ona tatou o mai faatasi e le afaina igoa o a tatou tapuaiga ma o tatou talitonuga, ae ua tasi i tatou uma ia te ia.
O i tatou o lana fanau, ua fesootai i tatou ia Iesu. O ia o le Alii o alii, o le Tupu o tupu uma lava, e ifo ma tootuli tulivae uma ia te ia. Viia le Atua!
O loo tatou iai pea i le tatou mataupu o le fausiaina o le faavae mautu, faavae malosi e tumau e le maluelue. Ua faamaonia i le tele o suesuega ma iloiloga sa faia i le aafiaga o nisi o fale tetele i mafuie, matagi, afa ma lologa malolosi, na iloa ai e lei lelei atoatoa ona faavaeina nei fale.
O le tele o fale i nei aso, e matagofie lona galueaina i le vaai a tagata peitai o le a iai le taimi e matua tofotofoina ai le faavae o lea fale pe mafai e lona faavae ona tatali le malosi o matagi ma lologa tetele.
E faapea foi lo tatou soifuaga nei. E faatoa iloa lava le Kerisiano faamaoni ma mausali le soifua faaleagaga, i taimi e agi faafuasei mai ai matagi ma afa malolosi e ala mai i tofotofoga, tiga ma mafatiaga o lenei olaga.
O le faamoemoe autu lena o nei aoaoga, ina ia fausia o tatou olaga i faavae mautu o le afioaga a le Atua. Poo le a le fafati malosi mai o peau o le olaga nei peiseai o ni galulolo, o le a le afaina ai oe aua ua mautu le faavae e ala i taiala o le afioga a le Atua.
I le lua vaiaso talu ai, na aoao mai ai le Tusi Paia ia i tatou, o le Alofa Tunoa o le Atua ua faaolaina ai i tatou ae le ona o a tatou galuega lelei.
E le faatauina foi la lo tatou auala i le lagi i ni a tatou amio lelei. E tatau lava ona matua talia le galuega maeaea a Iesu i luga o le satauro ina ia togiolaina ai i tatou mai le sala sa tatou nofo pologa ai. Ma e tatau ona tatou mataala, ina nei faaseseina i tatou.
E tasi lava le faitotoa e ulufale atu ai i le malo o le Atua, o le faitotoa va apiapi lea e le toatele nisi e ui atu ai, ae o lona taunuuga e iu i le manuia; peitai le faitotoa va tele, e toatele foi e ui atu ai a o lona taunuuga e fano ai.
O loo manino le afioga a le Atua, “O Iesu, ua na o ia lava le Ala, o le Upu moni ma le Ola, e le sao atu lava se tasi i le Tama pe a le ui atu ia Iesu Keriso”.
I le Esoto 20:1-17, o loo iai poloaiga a le Atua mo Isaraelu. O nei la poloaiga o nisi nei o taiala na tuuina atu e le Atua i lona nuu e ao ona savavali ai ina ia latou maua se olaga faamanuiaina aemaise ai le taunuu atu i le nuu ua folafolaina.
Sa lei faigofie ia Isaraelu ona talia nei taiala, ona e feteenai ma le olaga sa ola ai i totonu o Aikupito.
O Aikupito o se nuu faapaupau ma e le talitonu i le Atua, e le fiafia foi e tapuai i le Atua. O le vaai la a Aikupito i le Atua o Mose ma Arona, ua na o se isi foi atua e faaopoopo atu i le anoano o isi atua o loo latou tapuai i ai.
Na fetalai manino le Atua ia Isaraelu: “Aua nei e fai mo oe ni atua ese i o‘u luma. Aua e te fai se tupua ua ta, po o se faatusa o se mea i luga, po o le fanua i lalo, po o le sami o i lalo o le fanua; aua e te ifo i ai, aua foi e te auauna i ai.
Aua e te tau fua le suafa o le Alii lou Atua; aua e le faasaoina e le Atua o le tau fua i lona suafa. Ia manatua le aso sapati e te faapaiaina. Ia e ava i lou tama ma lou tina. Aua le fasioti tagata.
Aua e te mulilua. Aua e te gaoi. Aua e te molimau pepelo. Aua e te manao i le fale o le lua te tuaoi.”
O le faamoemoe ma le sini autu o nei poloaiga uma a le Atua mo lona nuu o Isaraelu, ina ia aoaoina i latou, o le Atua o ia lava o le Atua e ona mea uma. O ia o le Atua silisili ese, e leai se atua i luma atu ma ona tua. Ua na o ia lava o le Atua moni e toatasi, e ao ona ifo ma tapuai i ai tagata ola uma.
O ia foi o le Atua fai vavega na ia aveeseina mai i latou mai le pulega a Farao, o ia foi lava lea na te taitai atu i latou i le nuu ua folafolaina mai o loo tafe ai le suasusu ma le meli. Ma o lona lava aao malosi na mafua ai nei mea uma.
O lea foi lava le feau mo tagata ola uma seia oo mai lava i nei ona po. E ao ona iloa e le lalolagi uma o le Atua o ia lava o le Atua o mea uma. O nei ona po, ua avea galuega, tupe, tamaoaiga, ma le oloa ma atua i le toatele ina ua tatou faamuamua ia mea ae faatuatuanai le Atua e ona mea uma.
Peitai, o le finagalo o le Atua ia tatou muai saili lona malo ma lana amiotonu; ona faaopoopoina mai lea o nei mea uma ia te i tatou. (Mataio 6:33)
E le natia Samoa le mea ua iai nei i tatou, ua taumafai lava le tagata i lona malosi ma lona atamai e ausia mea uma, ae o loo manino le afioga a le Atua, a tatou faamuamua o ia ma savavali i lana amiotonu, e le pine ona oo mai faamanuiaga i o tatou olaga.
O nei poloaiga uma ua le gata mo le nuu o Isaraelu, ae ua faapea foi ona avea ma taiala i o tatou olaga.
E anoanoai faamanuiaga tatou te maua pe a tatou savavali e tusa ma ia poloaiga.
O le taliaina ma le faataunuuina o nei poloaiga, o le filifiliga saoloto lea a le tagata. Ae o le mea moni, o lau filifiliga e te manuia ai, o lau filifiliga foi e te malaia ai.
Samoa e, e le mafai ona tatou faataunuuina le finagalo o le Atua i lo tatou malosi. E manaomia e tatou uma le faasinomaga mai le Atua, e ala i lana upu folafola. I le tusi a Teuteronome 28 o loo faapena ona faailoa mai ai manuia mo le tagata e usitaia poloaiga a le Atua. O nisi nei o ia folafolaga: “E manuia oe i le aai, e manuia oe i le fanuia.
E manuia oe i lau fanau, ma le fua o lou lauelelele, ma fanau au manu vaefa, o tama a au povi, ma ou lafu mamoe. E manuia lau ato, atoa ma lau mea e palu ai falaoa. E manuia oe pea e sau, e manuia foi oe pea e alu atu…….
Samoa e, aisea tatou te le filifili ai nei tatou te usitaia poloaiga a le Atua. Talitonu o le a le pine ona tatou vaaia manuia o le Atua.
Ae a tatou filifili foi e tetee atu ma le usitaia ana poloaiga, o le a mulimuli mai foi malaia pei ona folafolafolaina.
Manaia le filifiliga a Iosua: “Filifili ia outou i le aso nei, a o a‘u ma lou aiga matou te auauna ia Ieova”.
Manuia tele lenei vaiaso Samoa!