Tulaga Alii & Usitai o iesu o le alii

Faatalofa atu foi le Taiala i le paia ma le mamalu o Samoa i soo se vaega lava o le kelope o e maua mai ai lenei tusitusiga. Malo le soifua maua ma le lagi e mama. Malo le folau, malo foi le finau. E viia pea le alofa ma le agalelei o Iesu Keriso lo tatou Alii ma lo tatou Faaola. E iai le faamoemoe o loo maua se faamalosiau e ala atu i nei tusitusiga i vaiaso taitasi.
O le mea moni, e le tatau ona toe soifua faasamasamanoa pe ola faatamala se Kerisiano i lenei vaitaimi. Efeso 6:13, “O le mea lea ia outou tago ai i ofutau atoatoa mai le Atua, ina ia outou mafaia ona tutu ma tetee atu pe a oo i le aso vale.” Ioe Samoa, ua tatou iai nei i aso vale e pei ona folafola mai e le afioga a le Atua, ma ua alagatatau ai ona tatou mataala aua o le fili ua pei o ia o se leona tagi, o loo fesaeai solo e saili se tasi e faaleaga ma faatamaia.
A o faagasolo pea a tatou aoaoga i le fausiaina o se faavae mautu, e ao ona toe faamanatu atu pea, e leai, leai lava se faavae e sili atu i lo le fauina o lou olaga i le papa mautu o Iesu Keriso.
O ia o le faavae e fauina ai o tatou aiga, ulugalii, ekalesia, malo aemaise olaga taitoatasi. O ia lava o le pogai, o Ia o le autu, o ia foi o le mafuaaga o mea uma. Salamo 127:1, “Afai e le atiina ae e le Alii le fale, e galulue fua i latou o e atiina ae, afai e le leoleo e le Alii le aai, e mataala fua o le na te leoleoina.”
O le mea moni lava Samoa, e le mafai e lo tatou poto, poo lo tatou atamai, poo a tatou tupe ma le tamaoaiga ona ausia le lelei silisiliese o le Atua. O lona lava alofa le faatuaoia e ala i lona maliu i le satauro ua tatou faapenei ai.
O le mea lea e ao ai lava ia i tatou ona faaneeneeina ma faasilisili lona viiga ona o le galuega maeaea e ala i le faaolataga. E ao ona tatou iloa ona usitai ma gauai atu ia te ia ma lana pulega, aua o ia lava o le Alii o alii, o le Tupu o tupu uma lava, ma e ao ona matua viia o Ia.
Luka 6:46, “Se a ea le mea e taua ai au e outou, Le Alii e, ae tou te le faia mea ou te fai atu ai ia te outou?”
O Iesu Keriso e le gata o Ia o le Alii a o Ia foi o le Faaola.
O le toatele la o tagata Kerisiano, e na ona mananao lava ina ia faasaoina mai le pologa o le agasala ma ona aafiaga ae faaauau pea ona pulea lava e ia ana lava faaiuga ma lona lava soifua. Peitai e leai se faaolataga e aunoa ma le tuuina o Iesu Keriso i lona tulaga; o Ia o le Alii.
O le a le uiga o lea faaupuga? O lona uiga, ua le toe pule i taua ia i taua lava, a o Keriso o loo pule ia i taua. Ua ta loto malilie e usiusitai ma gauai i mea uma e finagalo ai Iesu ina ia tatou faia.
O le avea o Iesu ma Alii i soo se tagata, aiga poo le nuu, o se taiala e le faigofie, ona e moomia ai le oti poo le faamutaina o le tasi pulega ina ia mafai ona ola i lalo o le pulega fou.
O le faafitauli numera tasi lea o loo lepetia ai pea le tele o aiga ma ulugalii talavou i lenei vaitaimi ona o le musu e toilalo. E manao lava le tagata e fai lana pule.
Ia manatua, ua maea ona tuumatamaga e le Atua le soifua o le tagata ola. O le tasi vaega taua o le soifuaga o le tagata, o le tuua lea e le tane o lona tama ma lona tina ae faatasi atu i lana ava ma avea ai i laua ma tino e tasi.
Peitai e le mafai ona atoa ona faamalieina lea taiala i luga o soifua o le fanau ua faaipoipoina sei vagana ua tuua moni ma faamutaina le pulega a matua.
E le gata i lea ae tatau foi ia i laua ua faapaiaina i le sauniga o le faaipoipoga ona faamutaina le soifua nofo tutoatasi sa ola ma soifua mai ai le tagata lava ia, ina ia mafai ona gauai ma usiusitai le ava i lana tane, ma lagolago atu i lana lava tane mo le faataunuuina o lona valaauina mai le Atua, o ia o le ulu o le aiga.
I le tusi ua avea nei ma tatou taiala o le vaiaso, o i na aoai ai e Iesu le au faresaio i lo latou valea i le mataupu e uiga i le sapati. Ua latou tautu i tu ma aga masani o le tulafono ma ua le mafai ai ona faasaolotoina mai tagata mai agaga leaga, aemaise ai le mafai foi ona faamaloloina o o latou ma‘i.
Fai mai Iesu: “O le Atalii o le tagata, o le alii lea o le sapati.” Na matua ita le au faresaio ona fetautalatalai ai lea i se mea e ao ona faia ia Iesu.
O le tasi o vaega o lea aoaoga na ia fofola ai i le au soo ma le motu o tagata e toatele taiala, tu ma amioga e tatau ai i le tagata ua filifili e mulimuli i le Alii. Sa ia faamaninoina foi le eseesega o le malo o le Atua mai malo o le lalolagi.
O mea ua faatauaina e le malo o le Atua ma mea e faatauaina e malo o le lalolagi.
Na faapea foi ona tuuina atu e Iesu le luitau i e na faalogologo i ana aoaoga ma ia faailoa ia i latou, le ua tusa i ai o ia. E tusa o ia ma le tagata ua fau lona fale, ua ia eli maualalo, ua tuu le faavae i luga o le papa, ona sau ai lea o le tafe, ua le magaoioi ai lava; aua ua fausia lelei. A o le faalogo ae le faia, e tusa o ia ma le tagata ua fai lona fale i luga o le eleele, e leai sona faavae; ua fafati mai i ai vaitafe, ona pau loa lea, ona matua nutipalaina lea o lea fale.
O le mea moni Samoa o le avea o Iesu ma Alii ma Faaola e le o se mea faigofie. Aua foi e pei ona faailoa atu i isi mataupu ua tuanai atu, e tatau ona tatou oti mai tuinanau o le tino, ae liliu atu i ala ma manatu o le Atua. Soo se aiga Samoa lava, o le ua faasuafaina i le suafa poo le igoa alii o le aiga, o ia foi lea e faia upu o le aiga.
O ia e faalogo uma i ai tagata, e leai foi se toe finauina o sana faaiuga poo sana fetalaiga. E faapena foi le tulaga faaleagaga, o le taimi lava e te avea ai Iesu ma Alii i lou olaga, o le taimi lea ua e le toe pule ai oe ia te oe, a o Keriso ua pule ia te oe.
O lona uiga o mea uma lava e te faia, e ao ona e fesiligia lona finagalo, avea ona manatu ma ou manatu, avea lana upu ma mea e fausia ai lou olaga, ona e maua ai lea o se olaga mautu e le fefoifoiai.
Ona avea ai lea o i tatou faapei o le tagata poto ua fausia lona fale i luga o le papa; ua fafati mai tafega i lea fale, a ua le magaoioi lava.
Samoa e, ia matua suesue ane oe ia te oe, poo le a le ituaiga faavae lena e fausia ai lou fale. A o le fautuaga a le Taiala i lenei vaiaso, avea Iesu ma maatulimanu e fau ai o tatou soifua.
Tatou faatietie Iesu Keriso i lona tulaga o Ia o le Alii o alii, o le Tupu o tupu o lou soifua, ona faapena lea ona faamutaina le ola tutoatasi o le tagata mai le Atua, ae tuuina atu atoa lou soifua e pule aoao ai Keriso.
Manuia tele le vaiaso