Tulaga alii ma usitai e taua le faalogo ma fai

I le agaga faaaloalo tele e toe faatalofa atu ai Samoa le atunuu pele. E iai le talitonuga sa laugatasia i tatou uma i le alofa ma le agalelei faasafua mai o lo tatou matai sili i le lagi.
O le mea moni, ana le seanoa le alofa o le Atua, semanu ua fano i tatou.
O le mafuaaga lea e ao ai ona tatou faafetai, aua o ai ea se na te faateaeseina mai i tatou i le Alofa o Keriso? O le molimau a le Tusi Paia, e le mafaia e le oti, poo le ola, poo agelu, poo alii, poo e malolosi, poo mea i nei ona po, poo mea atali, poo le maualuga poo le loloto, poo se tasi mea na faia, e le mafai e nei mea uma ona faateaeseina mai i tatou i le alofa o le Atua, o loo ia Keriso Iesu lo tatou Alii. Viia le Atua!
Na tatou talanoa i le vaiaso na tuanai atu i le taua o lou silafia ma usitaia lelei o taiala e taitaiina ai le soifua ma le ola, ina ia taunuu le savaliga i manuia ua fuafuaina e le Atua.
Sa tatou mataituina ai taiala ma poloaiga na tuuina atu e le Atua mo lona nuu o Isaraelu, faatasi ai ma fuafuaga lelei mo lo latou soifua manuia. E anoanoai faamanuiaga na folafolaina mo i latou, ae paga lea, e le toulu fua mai nei faamanuiaga, sei vagana ua latou usitaia nei poloaiga ma savavali i taiala e pei ona faataatia mai e le Atua.
E manino lava le afioga a le Atua, e tauia e le Atua mea uma, o mea lelei ma mea leaga. O le manuia pe a usitai a o le malaia pe afai e le usitai pe tetee atu foi i le Atua ma ana poloaiga. Teuteronome 11:26-28 “Faauta mai, ou te tuuina atu i o outou luma i le aso nei le manuia ma le malaia; o le manuia pe afai tou te faalogo i poloaiga a le Alii lo outou Atua, a o le malaia pe afai tou te le faalogo, ae o ese i le ala ou te fai atu ai ia te outou i le aso nei, tou te mulimuli ai i atua ese ua outou le iloa.”
E masani i tatou matua ona fai faatonuga ma folafolaga i le fanau pe afai o le a tuua le aiga aemaise pe a fai malaga.
E ui lava la ina toesea mai le aiga, ua lava lava le upu poo faatonuga sa lua saunoa atu ai i le fanau e suitulaga ia te oulua a o lua toesea mai ai i le aiga. E iloa gofie lava le tamaitiiti e alofa ma usitai, pe afai e usitaia le faatonuga na tuuina atu a o lua toesea.
E faapena le olaga faaleagaga, ua afio atu Iesu i le lagi, ae ua tuuina mai lana Upu e fai ma taiala ia i tatou i le faigamalaga faaleagaga, ma e ao ona tatou usitaia.
O le tasi lea o vaega taua o upu faamafanafana atu a Iesu Keriso i ona soo ina ua oo mai le taimi e tuua ai i latou ae toe foi atu i Lona Tama. “Afai tou te alofa mai ia te au, ia outou tausi mai i au poloaiga.
O lē lē alofa mai ia te au, e lē tausia e ia au upu…” (Ioane 14:15, 24) O le eseesega o le tagata alofa ma le tagata e le alofa ia Iesu Keriso; o le tagata alofa e tausi i poloaiga, a o le tagata e lē alofa na te lē tausia foi poloaiga a le Atua.
O le alofa o loo aoao mai e le Atua mo ona soo, o le alofa lea e le gata i le upu ma le gutu a o le amio.
O le alofa e iloa i lou usitai ma anaana i lana upu ua folafola mai. E le taua lou iloa faalemafaufau o poloaiga a le Atua.
E taua i le Atua lou savali ai ma usitai, ma anaana e fai mea uma ua folafola mai e ao ona e ola ai.
I le Tusi a Paulo i le Ekalesia i Efeso (Efeso 5:3-5) o loo faailoa mai ai uiga ma amioga e le tatau ona faia e le tagata talitonu.
O nisi o ia mea e iai le faitaaga, amio leaga uma, o le manumanu, o le ifo i tupua, anovale, tautala i upu faatauvaa ma le faaulaula, aua o mea ia e oo mai ai le toasa o le Alii i e faalogogata.
O loo matua lapatai mai foi le aposetolo ina ia aua nei faatasi atu ia i latou o loo faia mea ia.
E manatu le Taiala o le vaiaso, afai tatou te faamaoni ma tatou suesue i o tatou loto, o le mea moni e leai se isi o tatou e sao mai ai i nei mea uma. Ae viia le Atua, o loo iai le avanoa tatou te toe fotuai ai ma salamo ma liliu atu i le Atua e oo mai ai lo tatou malosi faaleagaga e mafai ai ona tatou manumalo mai nei faaosoosoga uma.
O la Paulo, “ou te mafaia mea uma i le faatasi mai o le Atua ia te au”.
Ou te talitonu o faanaunauga o matua uma ia latou fanau, ia usiusitai ma faia mea uma e pei ona aoaoina ai i latou.
E naunau ina ia ola le fanau ma tupu ae i taiala e pei ona tuuina atu aua se olaga fiafia ma le faamanuiaina. Samoa e, o le finagalo foi lena o le Atua mo i tatou lana fanau.
Ua anoanoai faamanuiaga ua saunia e le Atua mo i tatou, ae ao ona tatou iloa, e le mafai ona tatou ausia manuia o le Atua, e aunoa ma le ola i taiala a le Atua.
E ao ona tatou usitai i poloaiga ma faatonuga ua tusia mai mo i tatou e ala i lana afioga paia.
Ua aoaoina foi i tatou, o le fua tatou te luluina tatou te toe seleseleina mai foi. O le ola tuuina atu i le Atua, o le ola faataulaga lea.
O lona uiga, ua tatou le toe ola mo i tatou lava ae ua tatou ola nei e faafiafia i lo tatou Atua, o le na maliu ina ia faasaolotoina i tatou mai le agasala ma ona aafiaga. Ua faapea foi ona toe tu manumalo mai o ia, ma o lo tatou manumalo foi lena.
Samoa e, aisea ea tatou te faalogotata ai pea? O upu o le afioga a le Atua, o le tagata poto e faalogo ma fai. E lelei le faalogo, ae le aoga pe a le faatinoina le mea o loo e faalogo i ai.
O le tatalo a le Taiala i lenei vaiaso lo‘u atunuu pele, ia avea i tatou ma tagata popoto, ua fau o tatou fale i luga o le papa mautu, O Iesu Keriso lea.
O lona uiga e le gata ina tatou faalogo i lana upu, ae ia avea le upu lena ma tapasa e taitaina ai o tatou olaga, atinae ai o tatou aiga, faatonutonu ai a tatou fanau, faatamaoaiga ai o tatou tagata aua tiute ma tofi ua tofia i tatou e galulue ma auauna atu ai.
O le a le pine foi ona tatou vaaia lea o faamanuiaga a le Atua ua folafola mai.
Faamanuia tele le Atua i lenei vaiaso Samoa!