E ui i se naunau ina ia oo atu le tatou au mai Samoa i le sini e pei ona tausinio ma aifilofilo ai i nisi o Iunivesite sa faia mai i Ausetalia, peitai e iai lava le upu “e lē mua uma ni vaa”.
O taaloga netipolo nei sa aofia mai ai ‘au mai Niu Sila, Fiti ma isi Setete o Ausetalia ae sili ai le tele o Iunivesite o Kuiniselani.
O le ‘au na malaga mai e aofia ai – Josie Suze, Taikerise, Ese Moke, Dorophy, Agnes Tupai, Olivia, Margret, Julia, Lotoata Tuna Maiava (Captain).
Sa auai mai foi le komiti e pei o le susuga ia Lipine Peresetene o ia foi o le peresetene, Angela o le faiaoga ma le taitaimalaga ia Tunumafono.
O le iuga o taaloga i le Aso Gafua, 8 Iulai, na manumalo uma ai taaloga e lua. O le Aso Lua, 9 Iulai, e lua taaloga ma na manumalo uma ai. O le Aso Lulu i quarter/finals sa manumalo ai ia latou taaloga e lua.
O le Aso Tofi o semifinal na lei faamanuiaina, toe taalo mo le sueina o le tulaga 3 & 4 ma sa lei ausia foi, ae ui i lea sa matuai faamalieina le mamalu o le atunuu sa maimoaina taaloga, ona o le tausaafia o tamaitai taaalo i taimi uma o taaloga.
Na iai nisi sa faamanuiaina i ni faailoga ma e taliu le faigamalaga o loo tulaga 4 i le taamilosaga atoa lea e lata i le selau ‘au sa tauva.
O le po o le Aso Toonai, 13 o Iulai na toe taliu atu ai i Samoa le faigamalaga a le au netipolo tuufaatasi a Iunivesite mai Samoa, ma e viia lava le Atua i mea uma ona o Lona alofa ua faataunuuina manuia ai le taamilosaga e pei ona malaga mamao mai ai.
