Tulafono e Puipui ai Lo‘u Aia Tatau e Tusia ai lenei Fesoasoani mo Tatou Tagata, ma Puipui ai Tatou Uma Lava

Ona ua iai foi le fili o loo taumafai e faaleaga  lenei tusitusiga, ua lāgā ai se manatu e talanoaina i le vaiaso nei aia tatau a tatou uma lava, i luga o le tulafono.

 

E Sili Lava le Puipuia i lo le Togafitia:

Pei ona silafia o vaiaso uma ou te taumafai e tusi atu ni mea na tutupu, poo tutupu, ma faamalamalama atu tulafono e aogā, ina ia silafia ai ma atonu e aogā e puipui ai outou taitasi, aiga ma fanau pe a tutupu mai ni mea e afaina ai i le tulafono.

Ae ua avea lenei fesoasoani ua faaaogā ai foi e ni papalagi ni tagata Samoa e taufaaleaga i lenei taumafai. O le tali a lo‘u tagata ou te faapea:

• Muamua e le o i totonu o la‘u tautoga i le Tusi Paia ma le tulafono, o le a ou loia, ona aveese ai lea o o‘u aia tatau faaletagata lea e puipui i tulafono a Niu Sila.

• E tutusa a‘u aia tatau e puipui i le tulafono ma aia tatau a tatou uma e amata mai i tagata matutua e oo i tamaiti.

• O tulafono nei e puipuia tatou uma lava, o le a na ona otooto atu ona e lē lava le tatou column lenei e talanoaina faalauaitele atu ai vaega tāua uma. Na ona faapa‘i atu mea e aogā ia manatua ai, e tele tulafono e puipui ai oe ina ia aua ne‘i soonafaia oe e se isi. E tatau foi ona e nofouta i ai i lou va ma se isi tagata, aua e lē na o oe e puipuia i le tulafono au aia tatau. O tulafono nei:

I lalo o le Human Rights Act 1993:

Section 63: Racial Harrassment (Soonafai o tagata ona o le faailogalanu)

 

E matuā faasā i lalo o le tulafono lenei ona faaaogā ni upu tusitusia poo ni upu e te tautala ai, poo ni ata faaalia, poo ni amioga fai:

• E faaali ai le inoino pe vaai maulalo, pe faia nisi tulaga e faamatagā ai ma inosia se tasi tagata ona o le lanu o le tino o lena tagata, poo le mea e sau ai, poo le atunuu e sau  ai lena tagata.

• E faasā i le tulafono ona fai e se tagata se mea e afaina ai se isi tagata ma tiga ai, pe faamatagā  ai.

E tele vaega eseese o tusia i lalo o le tulafono lenei e faaaogāina. Fesili i sau loia pe a fia maua lautele se fesoasoani.

 

Section 65: Indirect Discrimination (Nisi uiga ma amioga e faaeseese ai le faiga o tagata – faasā i le tulafono:

 

Soo se ituaiga amioga fai e faaali mai ai e ese se faiga o se tagata ona o tulaga ia e ta‘ua e faasāina i le tulafono lenei, e matuai faasāina lava i le tulafono lenei.

E pei ona ta‘ua i luga, e tele uiga o upu ma tulaga e faasāina i lenei tulafono, ae tāua le tou silafia e iai lenei tulafono e mafai ai ona puipui oe mai le soonafai o oe e se isi ona o oe o le Samoa.

 

• Section 66: Victimisation:

E matuā faasā i le vaega lenei o le tulafono le soonafai o oe e se isi tagata ona ua iloa e lena tagata ua e molia o ia i se solitulafono i lalo o le tulafono lenei.

I lalo o le Bill of Rights Act 1990:

S19 Freedom from Discrimination:

E iai le aia tatau a tagata uma lava e puipui ai i lalo o le tulafono lenei ina ia aua ne‘i soona faia o ia poo latou e se isi lava tagata, i ni tulaga faailogalanu pe vaai maulalo i ai ona o le mea e te sau ai, poo lou atunuu poo lou lanu.

S20 Rights of Minorities

O tatou uma lava Samoa e puipui i lalo o le tulafono lenei ona o tatou o tagata fai mai i Niu Sila, e iai uma o tatou talitonuga faakerisiano, e iai le tatou gagana faapitoa. I lalo o le tulafono lenei, e leai se aiā a se isi lava e faasā ai le faia o a tatou faatasiga, fai tapuaiga, fai fetufaaiga i luga o le tatou gagana Samoa.

E pei ona ta‘ua i luga, e leai se isi e leai sona puipuiga i luga o le tulafono. A ia aua ne‘i faaaogā sese ai nei puipuiga.

Ia tautuana ma i tatou aia a isi tagata ola uma tatou te feagai i aso taitasi.