Tuitui nifo konekarate i Saina maua e Ah Liki galuega o le Mali’oli’o

O vaaiga sa masani ai le alasima e sopoia ai le vaitafe o le Mali’oli’o i Samalaeulu i Savaii, peitai a mae’a le alasima laupapa fou o le a lē toe aafia femalagaa’iga a taavale ma tagata i taimi e tafe tetele ai le Mali’oli’o
O vaaiga sa masani ai le alasima e sopoia ai le vaitafe o le Mali’oli’o i Samalaeulu i Savaii, peitai a mae’a le alasima laupapa fou o le a lē toe aafia femalagaa’iga a taavale ma tagata i taimi e tafe tetele ai le Mali’oli’o

Ua faamata ia ma’ai meafaigaluega uma a le konekarate fau auala o le Ah Liki Construction mo le amatalia o le galuega tele o le toe fausia o se ala laupapa sima fou e sopoia ai le vaitafe o le Mali’oli’o i Samalaeulu i Savaii ina ua pusi nofo le faamoemoe o se konekarate mai Saina e faamautu i Fiti sa manumalo i le tauofoga e fausia ai le galuega. E aofia i le alalaupapa sima fou ma se auala faaopoopo poo se excess road.  E fitu miliona le ofo a le Ah Liki na tulaga lua lana ofo i le fausia o le galuega.

E 95 miliona le aofaiga atoa o le fesoasoani a le Faletupe o le lalolagi mo galuega o le toe faaleleia o auala o fesootaiga ma auaunaga tau fesootaiga i Samoa ma o lea tau atoa o loo iai ma le galuega o le alalaupapa sima fou i Samalaeulu. Ua faaalia e le Minisita o Tupe le afioga Sili Epa Tuoti i se pepa o faamatalaga mai le ofisa o le sooupu a le Malo, e faitau afe ma afe tagata o Samoa o le a faamanuiaina i galuega o auala ma isi auaunaga tau fesootaiga ua fesoasoani mai ai le Faletupe o le lalolagi.

O le naunautaiga foi lea o le Malo i fuafuaga alualu mamao o le tamaoaiga ia fausia ia malolosi ma mautu auala tetele mo feoaiga a taavale ma tagata.

O polokalame o le fausia ia lelei o auala tetele i lalo o fesoasoani mo suiga o le tau ua faaauala mai ai le fesoasoani a le faletupe o le lalolagi, ma o se galuega o le a asiasi ai i vaega eseese o feoaiga e le gata o auala ia lelei ona fausia, ae o alavai ma ala faaopoopo poo excess roads ia lelei ona tapena ma fausia fa’aga i taimi e tutupu ai mala faalenatura e pei o lologa ma tafega i taimi e faaletonu ma louloua ai le tau.e

E le gata ina agai lea seleni tele i auala i Savaii ae o le a faapena foi i auala i Upolu. O le alatele mai Malua agai i Faleoloa faapea le agai mai i le taulaga e pā’ia auala ta fou i Vaitele tai o le a faatupe foi i le fesoasoani a le faletupe o le lalolagi.

Mo le silafia e le atunuu faitau ua matua faaletonu lava le alatele mai le malae vaalele i Faleolo agai mai i Vaitele tai ua tailua ai taavale i le itu o le auala.  E fa’i o le vaiti o lea auala umi mai le malae vaalele ae ua papala ma patupatu le ta.