“E lē feagai gi ka‘ika‘i solitulafono ma ta‘ita‘i na filifilia e tagata”
A tatou silasila i upufai o Malo o le Pasefika, e lei tupu muamua ni finauga i le fefaaaliaiga o finagalo o ta‘ita‘i o Malo i ni mataupu, se‘i vaganā lava le mataupu o loo oia ai nei le lotoifale o upufai o le atunuu o Fiti, ina ua faoa faamalosi i se fouvale a le fitafita le faigamalo a lea atunuu i le tausaga e 2006.
I nai masina talu ona mae‘a le palota tele a Samoa na toe filifilia ai ona ta‘ita‘i, ae mapuna mai loa le isi fouvale a le fitafita a lea Malo e taulamua ai le ta‘ita‘i‘au o le fitafita o Commodore Frank Bainimarama lea ua avea nei ma palemia lē tumau poo se palemia faavaitaimi.
O le Palemia o Samoa, le ta‘ita‘i o se Malo tauatinae o le Pasefika ua ia faafetauiina le palemia lē tumau o Fiti, ae e lē o nofonofo ai foi Bainimarama i le tau‘ai mai o ana foi sauea e ala i lona tali mai i lafoga a Tuilaepa faasaga i ana pulega ua aafia ai le saolotoga ma le aiā tatau o tagata o lea atunuu.
E lē o solomuli Bainimarama i le tutumau i ana pulegamalo o iai nei, lea ua ia valaaulia ai le Palemia o Samoa e malaga atu o se sui faalogologo i taualumaga o le fono a Malo Melenisia e ta‘ua o le Melanesian Spearhead Group o le a talanoaina ai faafitauli o feagai ma Fiti.
O Samoa e lē o se sui o lea faalapotopotoga seia vaganā ai Fiti, Solomona, Vanuatu, ma Papua Niu Kini. I se tali a le Palemia o Samoa ua ave ia Bainimarama o loo faamanatu ai e Tuilaepa i lea ta‘ita‘i, le lē talafeagai o lona auai i le latou fonotaga, ae a maua se autasiga o finagalo o le latou faafaletui o Malo Melenisia o loo i totonu o le lio o le fono tele a Malo o le Pasefika le Forum, ona avatu lea i ai e soalaupule ai se faaiuga e taunuu i ai finagalo o ta‘ita‘i lea e aofia ai ma Samoa i le saofaiga lea.
Ua faamatalaina e lipoti a se nuispepa i Fiti le teena e Tuilaepa o le valaaulia a Bainimarama, o se aga e lē tusa ai ma faiga faa-Pasefika, le Pacific Way. Ua faauigaina ai foi i lea lipoti le taulamua o le Palemia o Samoa i le osofai o Bainimarama o se gaioiga o loo ia faataimua ai manatu o loo nonofo ma Niu Sila ma Ausetalia.
Peitai o loo iai le talitonuga o le toatele o isi tagatānuu o Fiti, o le lagalaga pea e le ta‘ita‘i o le Malo o Samoa o faiga ma pulega soonafai a Bainimarama ma i latou o loo lagolago i ai, o le saga feala ai foi lea o mafaufau o tagata o Fiti i se latou faaiuga e tatau ona fai. O le fono a Malo o le Pasefika o le a usuia i Vanuatu i le masina o Oketopa o le tausaga nei, o le a toe iloilo ma fefulisai ai le mataupu ia Fiti.
