O le taunuuga o togafiti a fomai, ua toe maua le malosi, peitai ua faaaogāina le nofoa faataavalevale. E lē fia ta‘ua le tulaga mafatia aemaise o le aafia o le tino atoa talu ai le faalavelave na tupu.
Ona o le lē atoatoa o le malosi ua iai, na mafua ai loa ona teena avanoa e pei ona faatali mai i Samoa, ae ua faamautu ai pea i Niu Sila e faaauau ai ona togafitiga aemaise ai nisi o faamoemoe sa manatu i ai, e faatatau i le ituaiga malosi ua iai le tino.
E fa tausaga sa nofo ai pea ma vaavaai i le Atua, ma taumafai ina ia talia lea foi ituaiga olaga fou ua oo i ai. A toe manatu i le talavou ma le malosi o le olaga sa iai, a o lea ua faafuasei ona suia ma ua taunuu i se isi lalolagi sa lei manatu e oo i ai.
O le mavae o ia tausaga ua amata foi ona masani ma tumau le fiafia, ma ua talia foi le soifua lē atoatoa, na manatu ai e tele nisi vaega o le olaga e mafai lava ona fai. O le mafaufau o loo lelei pea ma malosi o lona uiga e mafai ona faaauau le tulaga o a‘oa‘oga, aemaise ai o Niu Sila, e tele le mau auaunaga e faatino ai manaoga e lē maua i Samoa.
O le tausaga e 2001, na taumafai ai e toe aoga i le AUT, ma sa fiafia lava e tauave le mataupu o tusi ma tupe (Accounting), ona o le manaoga lea o mātua sa iai a o faato‘ā amata mai lona soifua a‘oa‘oina. E tasi le tausaga na faamae‘a ai lea mataupu i le iunivesite o Aukilani, ona talosaga loa lea e fia suesueina le mataupu lava lea i le faailoga o le BCom. Na maua le tali ua faamanuia, ona toe talosaga foi lea i le mataupu tau i le tulafono, ina ia avea ma loia ma sa faamanuiaina foi ma talileleia le talosaga. O le talosaga mulimuli, sa ia taumafai ai pe mafai ona ave faatasi faailoga ia e lua.
O le BCom mo le silafia e tolu tausaga e a‘oa‘oina ai, a o le loia poo le LLB, e fa tausaga. Ae o le tali ane o le talosaga pe mafai ona fai faatasi faailoga e lua, na mafai ma ioeina e le AUT. O le penefiti o le fai faatasi o faailoga e lua, e na o le lima tausaga sa ofoina ane e mafai a o faatino pe afai e tuufaatasi, ma o le tulaga lena na faatino ai loa le a‘oa‘oga mo le lima tausaga.
O le tausaga e 2006 na faamae‘a ai le taumafai, ma ua faamanuiaina foi i faailoga soofaatasi e lua, ma ua faaigoaina ai o le BCom.LLB. E faapitoa le agavaa o Tuifaasisina i le tulaga tau tupe ma tusi (Accounting) i le faailoga BCom. E lei gata ai le soifua galue o Tuifaasisina ina ua maua faailoga, peitai o le a mafai ona e toe maua i ai se isi sosooga o le vaega o lona soifua, i le taimi na maua ai le galuega ma amata ai loa ona faigaluega.
Toe tulitatao mai le vaiaso a sau, mo le faaauauina o le talaga o le afioga ia Tuifaasisina Tofilau Karl Gatoloai, i lona soifua galue ma isi vaega o lona soifua, a o iai pea i luga o lona nofoa faataavalevale.
Ia manuia taualumaga o lenei vaiaso.
