Mātua:
Tamā: Bishop Aiolupotea Fia Gatoloai mai le afioaga o Lalomalava ma Apia.
Tina: Tofoipupu Gatoloai, mai le afioaga o Satuimalufilufi ma Iva i Savaii.
A‘oa‘oga:
Na amata mai le soifua a‘oa‘oina o le afioga ia Tuifaasisina a o iai lona soifua taulealea i le aoga maualalo a Apia Infant e pei ona sa faaigoaina ai i lena vaitaimi, ona sosoo ane ai lea ma le Apia Primary, mulimuli ane ulufale i Leifiifi Intermediate ma faaiuina ai i le Form Two a o pule aoga ai Mrs Lamosā Gaee.
O le 1993 na ulufale ai i le kolisi o Samoa mo a‘oa‘oga maualuluga mo le tolu tausaga, mai le 1993 i le 1996. O le tausaga lava lea na ta‘ua e Tuifaasisina, na te lē fia manatuaina ona o se faalavelave matautia sa tupu ma aafia ai. O se taavale na malaga ai ae faafuasei ona lavea i se laveaga tugā tele, ma o ia na matuā manu‘a tigaina. O le tigaina tele o manu‘a sa oo ai ina lē mafai ona togafitia i Samoa, ma na pau le faamoemoe sa iai o le aumai lea i fafo aemaise lava o Niu Sila. Sa taumafai malosi ona tuaa ma le aiga ina ia sailia se avanoa e auina mai ai i fafo mo togafitiga.
Na maua le avanoa e aumai ai i Niu Sila ma sa faamatalaina e Tuifaasisina, e ui ina aumai i fafo ma le faamoemoe e toe maua ai se suiga, peitai o lana faalogo i lena taimi ailoga a toe foi i se manuia lona manu‘a ma aafiaga ua iai, ae ui i lea sa tuu pea i le Atua i talosaga.
Na taunuu i Niu Sila ma faatino ai loa taotoga ma togafitiga e pei ona manaomia, o aafiaga tugā i le maea alio ma le tuasivi o ni vaega aupito i faigata tele ona toe faaleleia e tusa ai ma le mau sa tuuina e fomai.
O le mae‘a ai o taotoga sa faia na fautuaina ai ina ia faaopoopo nisi taimi e toe nofo ai i Niu Sila, mo le vaaia lelei ma le tausisia o puipuiga o le taotoga sa faia, aemaise ai o le saogalemu.
E oo mai i le tausaga e 1997, sa iai pea i Niu Sila a o le taimi foi lea na maua ane ai faaiuga o suega sa faia i Samoa.
E pei ona ta‘ua e Tuifaasisina, e lavea le taavale sa aafia ai ae faato‘ā mae‘a lava suega sa faia, o suega e ulufale ai i le isi laasaga o a‘oa‘oga i totonu lava o le atunuu, ia poo le maua ai foi o se avanoa e sikolasipi ai i atunuu i fafo. O le taunuuga o lona taumafai e ala i le faaiuga sa maua ane, na maua ai le avanoa mo le UPY (University Preparatory Year) faapea foi le NUS (National University of Samoa).
E ui i nai avanoa na faamanuia ane ai i Samoa mo le faaauauina o le olaga a‘oa‘oina, peitai sa faafaigata ona o le tulaga ua oo i ai le malosi o le tino. O le 1997 lava na faamaonia ai ua iai i se tulaga faigata manu‘aga sa iai, ma ua lē mafai foi ona toe faafoi le malosi atoatoa sa iai le tagata muamua.
