Soifua soofaatasi ma isi, ma galuega faaopoopo mo tagata lautele O loo avea ma taitaifono o le fono faufautua mo tagata Pasefika i totonu o le itumalo o North Shore (North Shore Pasefika Forum). O ia foi o se sui o le komiti faufautua mo le matagaluega a leoleo i Waitemata (Waitemata Police Advisory Board).
E le gata i lea o loo avea foi o se faatonu sinia o le pulega faaitumalo o le soifua maloloina a le itumalo o Waitemata lava (Waitemata DHB) ma le Enua Ola, o se polokalame o le soifua maloloina i lea lava itumalo. O Waitemata o loo tuufaatasia ai Aukilani i Sisifo ma North Shore. O loo fesoasoani foi i le tautua ma le polokalame ua faaigoaina o le Lu‘i Ola, e faapitoa lava mo i latou e le atoatoa le malosi o le tino.
Soifua faaleagaga ma le auauna ai i le ekalesia O loo tautua ma galue o se fesoasoani muamua (first councilor) mo le epikopo i le ekalesia a le Au Paia o Aso e Gata ai, poo le ekalesia Mamona e pei ona silafia ai.
Manaoga ma faamoemoega mo le lumanai Sa ta‘ua e le auauna o loo iai pea le manaoga ma le naunautaiga e toe fia foi lava i le atunuu e tautua ma auauna ai. O lona lea manaoga, aemaise ai foi o se manaoga sa faataatia ane e si ona tamā a o soifua.
O le tasi foi lea o mafuaaga sa naunau ai lava ina ia faataunuu aoaoga ma faailoga, maua le atamai e tautua ai le atunuu ma ona tagata. O Samoa o loo iai i fuafuaga mo le lumanai e pei ona ia saunoa i ai.
Ua faaipoipo Tuifaasisina Tofilau Karl Gatoloai, i le tamaitai o Vivian Slade ma ua toatasi lo la alo tamaitai. O le faletua ia Vivian e fesootai ia poo lona uncle le afioga ia Tuiloma Neroni Slade e pei ona umia nisi o tulaga maualuluga mo Samoa ma le lalolagi. O loo mafuta pea le susuga i le loia ma lona tuaa, le tina ia Tofoipupu Gatoloai.
Ua faaiu atu le talaaga ma faamaumauga i le soifua o le afioga ia Tuifaasisina. O le faafetai faapitoa ma le faamalo a le tatou itulau mo lenei foi auauna, sei tulou ona mamalu faaleatunuu ma le galuega, ona o le finau ma le taumafai e ui lava ona o loo nofo i lona nofoa faataavalevale i aso uma o lenei olaga, peitai ua ia ausia nisi o faailoga ma galuega maualuluga e pei ona tatou molimauina.
Ia viia le Atua. Soifua
