O vaega mulimuli ma aiaiga o le galuega lava faaloia, o le talosagaina lea o se laisene ina ia aloaia ai ma faagaioi loa le faatinoina o le galuega i ona tulaga uma. E le gata i lea a o le talosagaina foi o le laisene ina ia avea ai ma sui auai o le asosi a Loia i Niu Sila. Sa faamanuiaina uma tulaga sa taumafai i ai, aemaise ai o le faaiuina foi o le soifua aoaoaina, ina ua tau lau ma maua uma vaega moomia o le galuega faaloia, aemaise o le tulaga o tupe (Accounting, Barrister, Solicitor).
Soifua galue i galuega
O le tausaga e 2008 na amata ai ma faigaluega i se tasi o galuega e faapitoa i ai ona agavaa ma le tomai o loo ia umia. E tasi le tausaga sa galue ai le auauna i se kamupani tele, KFM & Associates e faaaoao ai ma faataitai agavaa sa ia maua ma faamanuiaina ai. Talu ai ona o se manaoga o lona tuaa, sa laina tutusa lelei ma le naunautaiga o Tuifaasisina, i le tulaga tau galuega o le mafuaaga lea sa taumafai malosi ai ina ia mafai ona faataunuu ia manaoga.
O lea manaoga, ina ia faigaluega mo ia lava, ma pulea e ia lava ona taimi, atoa ai ma le faatinoina o galuega.
O le isi lea mafuaaga sa taumafai malosi ai lava ina ia umia laisene ma tusi faamaonia, ina ia faatino ai le amataina o lana lava pisinisi ma se kamupani e pulea lava e ia.
O le faaiuga o le tausaga na tea nei 2008 na faavaeina ai ma amata le auaunaga ma le tautua mo tagata lautele.
O ia o se loia tumaoti, e tutoatasi foi mo le fesoasoani i le tulaga o le tulafono, aemaise o mataupu tau tupe, lafoga ma teuina o tupe, ma isi.
E pei ona ta‘ua i luga, e mafai e Tuifaasisina Tofilau Karl, ona faatino le atoatoa o le galuega faaloia e amata mai lava i le faatalanoaina o mataupu seia oo i totonu o le fale faamasino mo suesuega ma le finauina o mataupu e uiga i le tulafono. O lana galuega lea o loo iai nei, ma tautua ai mo soo se tasi o loo fia maua lea fesoasoani.
