O le tamaitai loia le susuga Unasa Iuni Sapolu

O le tamaitai loia le susuga Unasa Iuni Sapolu

O le tagi a le tamaitai loia le susuga Unasa Iuni Sapolu faasaga i le Faamasino o le faamasinoga faaitumalo le afioga Talasa Lumepa Atoa Sa’aga, ua tu’i mau ai i se faai’uga a lea faamasinoga le i’uga a le faamasinoga maualuga na taofia ai le suesueina o le mataupu poo le tagi a le tamaitai loia. Na faaulu le talosaga a Iuni ma tuuaia ai le faamasino i le pito tasi ma le faa’au’au o lana faai’uga i le itu a leoleo. O Unasa Iuni Sapolu na molia e leoleo ma suesueina ai lona moliaga o le lafo o upu tau faifai. O le faaiuga o ia suesuega na faamaonia ai le moliaga ae na faia le faaiuga a le tamaitai faamasino o Talasa e faapafala se faasalaga e aunoa ma le faamaonia o se moliaga (discharge without conviction).

Peitai o le mafuaaga lea na oo ai le tagi a le tamaitai loia i le faamasinoga maualuga ma faaulu ai lana su poo se civil claim faasaga i le faamasino. Na aapa le tamaitai faamasino ma faaulu lana talosaga e ala mai le Loia sili a le Malo, e taofi le suesueina o le su a le loia poo se strike out motion. Na maea ona suesue le talosaga ma aumai ai le faaiuga a le tamaitai faamasino o le faamasinoga maualuga le afioga Mata Tuatagaloa ma apo le talosaga a le faamasino. Na faaalia ile faaiuga lea a Tuatagaloa e le mafai ona faia se tagi faasaga ile tamaitai faamasino ona o loo iai le malosiaga faaletulafono e noatia ai poo le immunity. I le silasila a le faamasinoga o talosaga apili i mau o le talosaga atu o le tamaitai loia, na latou lagolago ai i le faai’uga a le faamasinoga maualuga.

I mau na faavae ai le apili a Unasa Iuni Sapolu e manatu le faamasinoga apili ua le talafeagai le gaioiga a le tamaitai loia. Sa tuuaia foi i le apili a le tamaitai loia le faaiuga a le tamaitai faamasino o le faamasinoga maualuga na suesueina le talosaga sa finauina ai le taofia o le suesueina o le tagi a le loia poo le strike out motion.

O le manatu o le faamasinoga apili o sosaiete a loia e latou te faia se aoa’iga mo se o loo avea ma ofisa o le faamasinoga e pei o loia, pe a aliali mai lona faia ose gaioiga faapea e aafia ai le tulaga tutoatasi o le faamasinoga.

O le teena o le apili a Unasa Iuni Sapolu ua faatonuina ai nate totogi i le tamaitai faamasino sa ia molia, le tau o taualumaga o le faamasinoga e $16,500 tala. E ese mai ai le totogi o le faamasinoga maualuga na suesueina le talosaga o le strike out motion lea o le a toe foi lava i lea faamasinoga e iloiloina le tau sa faafoe ai lena su’esu’ega.