E ta ane le ono i le afiafi o le Aso Faraile na tea nei, ua amata ona vaovaogata le galuega a alii sikulati i le tau faasoasoa o le pakaina o taavale, i le nofoaga o le Faith City Church i Manukau, sa faataunuuina ai le sauniga faapitoa sa faaautuina, Tama Tane Malosi.
O le ata manino lea, o le sapasapaia ma le matuā lagolagoina e tama ma talavou, le faamoemoe o le tuufaatasiga sa faapitoa lava mo lo latou lava itupa, e pei ona sa faataunuuina i le faaiuga o le vaiaso.
O se mafutaga sa matuā oo i ona ooooga ona lesona mataupu, ma feau faaleagaga sa tautalagia e Auauna faapitoa a le Atua sa folafolaina le Tusi Paia.
Ae sa lē gata i le matagofie o feau faaleagaga sa tufaina e Auauna a le Atua, peitai o le isi itu tāua sa molimauina, ona o le toatele o nisi e uo mamae, ua leva ona masani i totonu o aoga, galuega ma nuu i Samoa, ae sa toe fetaui ma toe feiloai ai i aso e lua sa faataunuina ai le faamoemoe.
O nisi sa gata feiloaiga a o tamaiti ma fesesetai solo i le vaofilifili o tafaoga faatama talavou, ae sa faateia ina ua toe fetaui ane i le po o le Aso Faraile ma le Aso Toonai, ua avea ma Faifeau nisi, a ua iai faatasi i totonu o le vaa o le Faaolataga nisi.
Sa soifua faatasi a‘e nisi mafutaga e le taleni i musika ma pese, peitai o lea feiloaiga na vaaia ai, ua faamealofaina nisi i taleni o pese, viiga ma musika. Ae o nisi foi mafutaga, sa lē manatu i ni galuega tāua, ona o le vaivai sa iai, peitai na toe feiloai ane, ua maualuluga nisi i galuega a le Malo, a o nisi ua avea ma faauluuluga i kamupani, pe ua ia puleaina sana ia lava pisinisi. O nisi ia o uiga matautia ma le matagofie sa maitauina ina ua toe mafuta ma tuufaatasi tamā ma tama talavou, i se vaega o le polokalame a le Promise Keepers, sa faatinoina i le gagana Samoa, ma faaigoaina o Tama Tane Malosi, mo le uluai taimi i Niu Sila.
E lē na o feau faaleagaga sa lufilufiina i lea faamoemoe, peitai sa faapea foi ona faafofoga ai i tautinoga ma molimau a nisi o tama sa talenia i taaloga, a o iai le malosi faatama talavou. O nisi sa molimau i mea tetele ma vavega sa faia e le Atua i o latou soifua, ma toe laveaina mai ai i ni faalavelave matautia, semanu a fano ai. O le taimi nei, ua toe faaaogāina i nisi o taleni sa lei mafaufauina.
O nisi foi sa tautino i le tulaga o le maualuluga o galuega sa ausia i totonu o Niu Sila, ona o le ulavale ma le sogasoga, peitai sa matuā vaivai lava ma maualalo aoaoga sa iai.
O le maitau ma le faavasegaina o molimau, tautinoga ma gaioiga uma sa faia ma faatinoina i lea mafutaga, sa faamaonia ai le faamanuia o le Atua i tama tane i o latou tiute ma a latou matafaioi tauave. Ona o le feau sa momoli e auauna a le Atua, sa faamamafaina ai le amatamea o tamā poo tane i le finagalo o le Atua, faapea lana foafoaga e pei ona ta‘ua e le Tusi Paia. O se toe faamanatu tāua tele mo tane, ina ia mauaa lona tulaga o le Taitai o le aiga i le mea moni, ma le filemu e faavae i le finagalo alofa o le Atua, ae lē o le sauā ma le faapaie ma le loto ita.
O le susuga ia Pastor Iliafi Esera ma Pastor Kuki Aloalii, ma Pastor Tavale Mataia, o Failauga faapitoa sa folafola le Upu faauuina a le Atua. O tautinoga ma molimau, sa valaauina ai le susuga ia Laavasa ma Alex Su‘a, ta‘uta‘ua ma sa lauiloa ai Samoa i le taaloga o faipelega i o laua foi vaitaimi.
O nisi o tautinoga faapitoa sa saunia e le susuga ia Filipo Sio Tevaga, sa maoa‘e foi lona sao i le mafutaga ona o le tulaga o galuega sa ia ausia. O le afioga i le Faamasino Samoa i Niu Sila, Aeau Semi Epati, sa faasoa i lona soifua mai i le atunuu, seia oo ina filifilia i se tasi o tulaga maualuga sa iai i le Faamasinoga a Niu Sila, o se Faamasino muamua a le Pasefika, faapea foi ma Samoa.
O nisi o galuega faufautua ma upu apoapoai, sa nafa ma saunoa faalaeiau i ai le toeaina ia Rev Elder Faamalua Peteru. O le komiti sa nafa ma le taliina o fesili, o le toeina ia Rev Faamalua, Rev Faasoo Auvaa, Afioga Faamasino Aeau Semi Epati, Rapi Ieremia, ae sa faatautaia e le susuga ia Pastor Tavale Mataia. O le susuga ia Pastor Lui Ponifasio sa faasoasoaina le polokalame ma lona faasoloina.
O se tasi o vaaiga matagofie, o se aufaipese tuufaatasi sa na o tamā lava ma tama sa auai ma faatinoina nisi o viiga. O nisi o Faifeau, tama ma talavou mai ekalesia eseese sa auai i le aufaipese autū o le aso. O le tuufaatasiga foi lenei, e lei faapitoa mo na o tamā ma tama talavou o se ekalesia e tasi, peitai mo soo se ekalesia ma soo se lotu, pe a finagalo ai.
O le tasi lea o auga ma le agaga maualuga o lenei mafutaga sa faavae ai, ina ia talepe, le faailogalanu ma le faailoga lotu. Ia alolofa i ava ma taitoalua ma fanau. Ia fausia ma tulai mai tamā o ni tagata malolosi e lē gata i aiga, a o totonu foi o le ekalesia ma soo se faalapotopotoga e iai.
O loo toe taoto atu nei i le Komiti Faafoe o le itupa Samoa, ma le Pulega o le Promise Keepers i Niu Sila atoa, le toe faia o se isi mafutaga faapenei a Tama Tane Malosi mo le tausaga fou, ma le aga ai i le lumanai.
