A o saunoa le taitaifono o le Komiti Faafoe (Board member) o le LOGOS Pacific Institute of Christain Studies, le Susuga Reverend Alesana McCarthy i le talaaga ma le faavaeina o lenei pepa ma lona faagasolo mai, na lagona le faagaeetia ma le loto faamanū, o le leo o viiga ma le faaneetaga i le Atua, ona o lenei ua vaaia fua aliali o lona alofa faaauau ina ua a‘e malo le seuga, ua tuta ma ua tutaula nei sa o auauna sa a‘otauina i fanua ma le manuia.
A o se faamoemoe foi sa fau ma pulupululima faatasi lona faataunuuina e susuga i faafeagaiga ma faiaoga. Ua malo tautai a‘e, malo le lototoa, malo foi le saili malo ona o le alofa i le Atua. Sa faafofoga ma le manino ma le toto‘a le paia ma le mamalu o le auvalaaulia auā e matagofie lona faagasologa i itu uma mo le faatinoina ma le kilivaina o mataupu sa suesueina, ma ua mautinoa nei le faaauupegaina o auauna ua faamanuiaina nei e fai ma avefeau mo le Alii.
O se sauniga matagofie ma le faapitoa lelei na tapenaina ma le mitamita loloto auā o le faamoemoe maualuga ua taunuu nei, o le laau o le soifua manuia lea.
O se laasaga fou ma o se matati‘a muamua foi lea ua faatuina nei e le BEST Pacific Institute of Education ina ua faamanuiaina ma faauuina ai ona sui faalea‘oa‘oga e fai ma avefeau o le tala lelei ia Iesu Keriso ma tala‘i atu le faaolataga e ala ia Iesu ma lona alofa tunoa.
Na matuā faatumulia le maota o le Manhattan i le po o le Aso Faraile i aiga, uo aemaise o le auvalaaulia faapitoa na latou auai atu ma molimauina lenei faamoemoe tāua. Na taitaiina le faafetai e le Susuga i le faafeagaiga Rev. Maafala Koko o ia foi o le sui o le Komiti faafoe o le LOGOS. O le saunoaga aami poo le saunoaga faapitoa na saunoa i ai le susuga ia Eroni Clark a o le M/C o le tamaitai o Joycelyn Tauveihi ma sa faafofoga foi i se pese mālie na lagiina e le tamaitai o Isabella Meleane Moore.
E toaluasefulu sui na latou faaaogāina ma finauina lenei avanoa tāua i totonu o le 48 vaiaso mai i le tausaga 2011 seia oo mai i le tausaga lenei 2012, ma ua faaiuina ai loa a latou taumafaiga ma faapaleina ai i o latou loto le avea ma auauna e faasoa atu i tagata lautele le tala lelei ia Iesu Keriso.
O le toaluasefulu lenei o sui faauuina e leai se isi na lei saunoa faamama‘i i le matagofie o lenei faamoemoe ma ona a‘oa‘oga, e maoae foi le tomai faasoa mai ma faasoa ane o susuga i alii ma tamaitai faiaoga aemaise o susuga i faafeagaiga.
E tele lava vaega o le olaga faakerisiano, o le taliaina ma le a‘oa‘oina i le upu a le Atua ua mafai nei ona o latou iloaina ma silafiaina, ma ua fai foi lea ma faamalosiau, o le lototele ma le faagaeetia e maua ai le fiafia e tala‘i atu ma fesoasoani atu ai i tagata lautele i le fafagaina o le ola faaleagaga ma le ola faakerisianoina.
E matagofie ma lelei lava le Atua, e silisiliese lava lona alofa ma ana faamanuiaga ala eseese mai i ona tagata. Na lagona foi le leo o le faavauvau, le loimata maligi ma le loto faanoanoa ona ua valaauina ma faamanavaina e le Atua taumafaiga ma le auaunaga a se tasi o sui sa tauivi mai i totonu o lenei vasega.
Molimauina le faamaoni ma le sogasoga o lenei sui aua na ta‘ua e susuga i faiaoga aemaise o sui uma o le vasega lenei, lo latou misia o le tina ona sa faaalia lona finau ma le naunuatai ma le faamaoni ina ia tini ma tau lau o lona taumafai. Peitai ua lē ogatasi le futia ma le umele, ua pule pea le Atua silisiliese.
Sa faauuina ai foi le alo tamaitai o le tina ua malaga, ma o si ona alii lava na tauaaoina le tusipasi mo si ona faletua ua motusia nei le la mafutaga i le finagalo fai toatasi o lo tatou Atua.
Ia o le loto faafetai lava ma le agaga vivii i le Atua auā e lelei lava o ia, e faavavau lava lona alofa. Na te faia pea mea silisili mo le tagata a o le tagata, a uma ona tatou faia o se mea ua matagofie ma lelei, ona tatou faapea ane lea, o tatou lava o auauna lē aogā i luma o le silafaga ati a lo tatou Alii. Mo i latou uma ua faamanuiaina nei, ia sagai ane manū mai lagi o le Atua e fai ma faamuamua e taialaina o outou ala ina ia faasafua ma faasalafa atu lona alofa ma lona manuia i tagata lautele e ala i lo outou tomai ma lo outou agavaa ua faatamaoaigaina ai outou.
