E usuai atu i le vaiaso na tea nei i galuega ua tumu tua ane o le Maota o le Ioane Viliamu i Tamaligi i le nofoaga lea e iai le Maota o le Faafeagaiga o le Lotu Porotesano (Protestant church) i lea nofoaga o Apia. O faifeau ma sui o aulotu mai i le atu Aana ma isi vaega o itumalo i tua o Upolu atoa ai vaega o Savaii.
O pusa oloa o loo tutu ai i tua ane o le maota o le susuga Rev. Nuuausala Siutaia, o ia lea ua fai ma fesootaiga a le faalapotopotoga lenei ua ta‘ua o le Samaritan’s Purse e tufa atu meaalofa ua saunia e fanau mai i Ausetalia ma Niu Sila mo fanau i Samoa.
Na amata lenei faiga i le tausaga na tea nei lea e tusa ma le to‘a 10,000 fanau na maua ai a latou meaalofa ma fesootaiga ma fanau na saunia nei meaalofa.
O le mae‘a o le afā o Eveni na maua ai ia meaalofa ma o lea ua faaauau ai lava i tausaga taitasi. O lea foi la e faagasolo lava le tufaina o nei meaalofa i aulotu eseese e lei maua lea agalelei i le tausaga na tea nei.
O le isi tulaga tāua ua matauina i lenei polokalame, o le toatele o tamaiti Samoa ua mafai ona fesootai atu i Ausetalia ma Niu Sila ma faafetaia le agalelei o fanau laiti ua o latou foai mo fanau a Samoa i le lua a‘i lenei o tausaga.
O le faamatalaga a le susuga i le faafeagaiga, ua sili atu i le to‘a 10,000 fanau ua maua meaalofa o lenei tausaga ma o le faafetai e lē uma i le agalelei mai o lea faalapotopotoga. O le taumafaiga lenei ua ta‘ua e Rev. Nuuausala, o se faiga ua unai ai fanau i fafo i le lima foai ma le fesoasoani i fanau a le Pasefika e lē o maua faamanuiaga e pei ona o latou maua ma o lea la ua faasafua mai lea agalelei.
E lē mafai ona tatala ia meaalofa ina ua tapa e tusitala mo ni ata peitai o pusa ia e tuu ai seevae, o totonu ua iai soo se ituaiga meaalofa ua saunia e fanau i Niu Sila ma Ausetalia.
O le vaiaso atoa lava la na agai atu ai aulotu ua filifilia le oo i ai ia meaalofa mo lenei tausaga.
