Ua tauaaoina nei e nisi o aoga ma faalapotopotoga i totonu o nuu ma afioaga i lo tatou atunuu e faaaogā ni fesoasoani tupe ua latou maua mai le fesoasoani a le Malo o Ausetalia mo atina‘e e pei o totoga e faaaogā i a‘oa‘oga a le fanau e pei o masini komepiuta, ma mea taaalo mo le fanau aemaise o atina‘e tau faatoaga e pei o lafupuaa.
O le polokalame fesoasoani a le Malo agalelei o loo taulai i le siitia o le tulaga tau tamaoaiga ae faaitiitia le mativa, faaleleia a‘oa‘oga faapea ma le soifua maloloina.
O le Malo Ausetalia o se tasi lea o paaga a Samoa o loo malosi lona fesoasoani i soo se atina‘e mo le siitia o le soifuaga lelei o tagata i Samoa aemaise o le atiina a‘e o le tamaoaiga.
I le faasoasoaina o foai tupe e tusa ma talosaga na tuuina atu i le ofisa o lea Malo i Apia.
O le aoga faataitai a Mrs Reeds i Papauta e $10,000 mo le faatauina o meafale mo le aoga faapea masini komepiuta.
O le kalapu a le Roteri i Savaii e $10,436 mo le faafoeina o se tauvaga mo le sipelaina o upu auā aoga i Salafai poo le spelling bee competition.
O le vaega o tina faipisinisi le Women in Business e $6,542 e faaleleia ai le latou atina‘e o le maketi i fafo o fua o faatoaga e maua mai i faiga faalenatura poo organic food. Tiapapata Art Centre e $7,516 mo le faia o se atina‘e fou o le toe faaaogā o pepa ua lafoai poo le paper recycling project. Vaitele-uta Mafutaga a Tina (EFKS) e $5,656 e faatau ai laau suisui. Sapunaoa Preschool e $7,586 e faatau ai meataalo a le fanau ma isi vaega e pei o nofoa ma kesi.
O le auaunaga o le Tavana Nurse on Wheels e $5,500 mo se masini komepiuta.
O Vaigaga Primary School e $19,000 e faatau ai ni nofoa ma kesi fou mo le fanau. Etena Fou Falelolo Preschool e $8,123 mo meataalo a le fanau.
O komiti a tina ma tamaitai i afioaga o Lepuiai Manono, Siumu i Sisifo, Faleu Manono, ma Saloga i Salelologa, e ta‘i $7,000 tala mo le faatauina o ni laau suisui auā galuega atina‘e a ia mafutaga ma komiti.
O le nuu o Fatuvalu i Safune e $5,861 e faatupe ai le fauina o sai puaa, ma le aoga a Sagato Maria i Savalalo e $6,950 mo le faatauina o ni meataalo af le aoga e faaaogā i taaloga.
E ese mai nei foai tupe, o isi foi fesoasoani a Ausetalia e pei o le polokalame o le totogiina o se vaega o pili ma meaaoga mo aoga tulagalua i le atunuu, e lē aofia ai aoga tulagalua tuma‘oti poo private schools.
O se fesoasoani o loo vaavaalua ai ma le Malo o Niu Sila.
