“Ua faapopoleina le vaega o faigafaiva”
E fofo a Alamea, o se alagaupu a Samoa e faasino i se tulaga ma‘ale‘ale ua oia ai le va nonofo o ni tagata, se nuu ma se aiga. E maua mai lea alagaupu pe a tu le vae o se isi i le sami i le meaola o le alamea ma ona ave talatala ma‘ai.
E leai la se isi fofo na o le faataliaga lava o le alamea, ae tuu i ai le alofi vae ona toe mimiti atu lea e le alamea o le ‘ona o ona tala, ma toe tea ai le tiga o le manu‘a.
Peitai e ui ina avea lea meaola o le sami ma mafuaaga o lea alagaupu a le atunuu ae e leai se isi e faia le galuega o le aveese o alamea mai gataifale o le atunuu ua faateleina ai e pei ona faailoa mai e le vaega o faigafaiva. Ua na o le mamalu o nuu ma afioaga o loo maopoopo ai pulega mamalu a Alii ma Faipule, e mafai ona faia lea galuega.
O le faamoemoega lea o le vaega o faigafaiva i le Matagaluega o Faatoaga i se galuega o le a amata faatino i le Aso Gafua, aso 30 o Me 2011 o le aveesea o ia meaola o le sami ma ave i uta i le pa‘u mātū e faatama‘ia ai.
O se suesuega na faia i le amataga o le masina nei o Me e le vaega o faigafaiva na molimauina ai le faateteleina o ia meaola i aloalo o gataifale o nuu na aafia i sauāga malosi a le sunami poo le galuafi na aafia ai se vaega o nuu i le itu i Saute o Upolu.
O nuu ia mai le Mata Aleipata faasolo atu i Saleapaga ma Lepa, o Lotofaga, Falealili ma Siumu. Sa lipotia e tagata o ia itumalo ma nuu i le vaega o faigafaiva le faateleina o alamea, ma faapea ona faia ai loa le suesuega ma faamaonia ai.
O popolega i le faateleina o lea meaola o le sami, ona e vave ona faaleagaina ai ‘amu o le sami ma nisi o figota tāua aemaise o le lamatia ai o soifua o tagata e fagogota faapea le au taeele. Sa taloina e le vaega o faigafaiva se fonotaga ma sui o nuu ma afioaga ua vaaia ai lea faaletonu, ma maua ai le autasiga o finagalo o le a faatino loa se galuega taulogologo mo le silafia e le atunuu, atoa ai ma le faamamāina o gataifale mai le aveesea o alamea. “O le a galulue foi le Vaega o Faigafaiva ma afioaga i lea faamoemoe, ma o le a faasolo i afioaga uma i le atu Falealili, Lotofaga, o Lepa ma Saleapaga faapea ma Siumu”, na faaalia ai e se ofisa sinia o faigafaiva.
“O loo faamoemoe e faaauau pea lenei galuega seia oo ia Iulai o le tausaga nei lava”. Ua lē gata ina pulupululima nuu ma afioaga ua aafia gataifale i le tele o alamea e aveesea, ae o le tatalo foi a le vaega o faigafaiva i le lautele o le atunuu ina ia lagolagoina le galuega e ala i le aveesea o alamea mai o latou gataifale pe afai ua vaaia ai foi le faateleina.
“O popolega sili ona ogaoga i le faateleina o lea meaola o le sami, o le aafia o taumafaiga i nuu ma afioaga na aafia i le sunami ina ia toe faaleleia o latou gataifale i le toe faaola lelei o le amu, ma toe foi ai i tulaga lelei sa iai mo le fagotaina ma faaaogā i taelega”.
