O le ofi atu o fanau a Samoa i tausinioga faavaomalo o le soka ua taua e le alii faiaoga a le Oceania o loo faatautaia se aoaoga i le atunuu, e faatoa mafai ona vaaia pe afai e amata atu lava i le laititi o le tamaititi poo le teineititi ona toleni ai i lea faagatama.
O le tulaga ua iai nei le taaloga i Samoa o lea faatoa amata ona toe avatu fanau e i lalo ifo o le 18 tausaga i se polokalame ua tuufaatasia e le asosi o le soka i Samoa i Aso Toonai taitasi ona o le taumafaiga ina ia iai ni aoaoga o le taaloga o le Soka e faatautaia mo le fanau laiti.
O le saunoaga a le alii faiaoga lenei, o le tele o fanau i motu laiti o le Oceania, e faatoa maua lava le avanoa e taalo ai i tausinioga o le soka pe afai ua oo atu i le matua lea o le 18 tausaga.
Sa iai taamilosaga na faatautaia mo le fanau aoga a o iai le pulega tuai o le soka peitai na taape loa ona o suesuega a le FIFA lea na faatautaia i tala o le tupe a le asosi, ma maea atu ai lava ma taaloga a le fanau.
O fuafuaga faataatitia la a le pulega fou ua iai nei a le asosi soka a le atunuu ina ia toe foi i aoga ma ia mafai ona amata mai i le laiti o le fanau lenei tausinioga, faaopoopo i ai ma taaloga aemaise aoaoga ia e faia i Aso Toonai taitasi.
O le aoaoga na faatautaia i lenei vaiaso ua mafai ai ona aoao atu faiaoga, ma sui o le asosi o loo faatautaia le atinae o le soka i le atunuu i tulafono aemaise o le faatautaiga o taaloga.
Faaalia foi e le asosi fou o iai nei e ala i lo latou sooupu le tamaitai o Josephine Nickel Leaupepe, o le faigata lava ona vaaia o le toe atoatoa o atinae o le soka i le fanau ona o le leai o ni meataalo ma ni faiaoga lelei latou te faatautaia polokalame nei a le fanau i aoga taitasi, ma o le mafuaaga lava lea o le valaauina o faiaoga o aoga taitasi e oo mai mo lenei polokalame ina ia mafai ai ona faasoa atu le tomai o lenei alii ua ia faafoeina taaloga ma atinae o le soka i atunuu o le Pasefika aua le toe amata ai o le faamoemoe e aoao fanau mai i le laiti i lenei taaloga.
E tasi le vaiaso o le faamoemoe ma o le maea ai o le a faatoa amata ai loa foi ona tuufaatasia o se polokalame mo taamilosaga a fanau e ala lea i tausinoga a aoga i totonu o le atunuu.
Faaalia e le asosi le faafetaia o le fesoasoani ua mafai ona maua mai i le asosi a le itulagi e faatautaia ai nei aoaoga. O Samoa o le tasi o atumotu e fa o le itulagi ia ua maua le avanoa e atinae ai lenei polokalame. O le tausaga atoa lea e faasala ai e le FIFA le asosi soka a Samoa mai i le ofi atu i tausinioga faavaomalo talu ai le tulai mai o faafitauli e pei ona taua, lea na suesueina ai tala o le tupe ma le faaaogaina. O le faatinoga o taaloga i le atunuu na faatupe uma lava e le FIFA ma o le mafuaaga lea o le faasalaga. Faaalia e Nickel-Leaupepe o le lelei foi lea o le atina’e o le taaloga ua faataatia nei, lea e aofia ai ma polokalame faatauvaga a le fanau lea na faatautaia ai lenei aoaoga, aua e oo atu i le taimi e toe ofi atu ai le Asosi Soka a Samoa i tausinioga ua vaaia e le FIFA ua tele se suiga i le itu tau i le atinae o le soka ua vaaia i le atunuu.
