Ua feagai pea le atunuu ma le faafitauli o le tele o taifau taaloa solo, ua lē gata ina lamatia ai le saogalemu o tagata ma turisi tafafao mai, ae faapea foi ona feaveai e taifau faama‘i e lamatia ai le soifua maloloina o tagata.
Ua manaomia ai nei e le faalapotopotoga e puipuia le saogalemu o meaola le Animal Protection Society poo le APS, se fesoasoani vave a le Malo e togafitia ai le tele o taifau taaloa ua toe vaaia i le taulaga i Apia.
Ua faaalia e se sui o le faalapotopotoga lenei e faapea sa soalaupule e le Palemene i le tausaga ua mavae le faia o se tulafono faatonutonu e faatino ai se fesoasoani mo le foia o le faafitauli, peitai e lē o toe maua se faamatalaga mai le Malo poo fea ua fai i ai lea fuafuaga.
O le mau a le faauluuluga o le sosaiete e puipuia le saogalemu o meaola, e telegese ma tuai ona faatino gaioiga a le Malo ae e iai lo latou talitonuga e lē o toe mamao ae faailoa atu se taunuuga o le tulafono faatonutonu e faaitiitia ai taifau taaloa.
E pei ona silafia o tausaga e lei mamao atu sa faatino ai se gaioiga na faafoe e le matagaluega o leoleo o le faaaogā o se aupega malosi e faamoe ai taifau taaloa ona ave lea i le nofoaga i Avele e tuu ai.
Talu mai ia tausaga ua tuanai sa faatino ai lea gaioiga e lē o iloa pe o toe faia pe leai.
O le tatalo a le sosaiete e vaaia le saogalemu o taifau ma isi meaola i le Malo, ia vave faatino se gaioiga e foia ai le faafitauli o le taaloa o taifau ona e lē gata ina lamatia ai le saogalemu o tagata lautele ma turisi, ae o faama‘i feaveai e ia meaola faaopoopo i ai ma le faatiga mata o le vaaia o nei meaola i vaipanoa eseese
o le taulaga.
