Ua tele tausaga o taumafai le afioaga o Vaimoso ina ia faamautu ni atinae auā le alualu i luma o fuafuaga a le afioaga.
Ua faapea foi ona taumafai le afioaga e saili i totonu lava o lona lotoifale ni fanua mo le faamautu ai o nisi o nei atinae, peitai o sailiiliga a le afioaga ua amata i lenei tausaga ua maua ai e lē o toe umia e le afioaga fanua sa iai le manatu o loo i lalo lava o le latou vaavaaiga.
O faatalatalanoaga a le Vaega o le fuafuaga o le taulaga (PUMA) ma afioaga i le talafatai o Apia mo fuafuaga alualu mamao e tali ai i suiga o le tau, na faatoa laga ai loa le mataupu lenei i fanua o avanoa ma fanua e lē o toe avanoa i le taimi lenei mo fuafuaga a Vaimoso.
O nisi o fanua i totonu o le afioaga, ua fai ai atinae, faatasi ai ma le soona tanu e i latou ua nofoia i le taimi nei.
O atinae e lua sa tagatagai i ai le afioaga o Vaimoso, o le malae taalo ma le toe faaleleia o le togatogo.
Peitai, o le vaiaso nei na faailoa atu ai e sui o le afioaga i le PUMA, o le fanua sa fuafuaina mo le malae taalo, ua faatau e le Peace Chapel ae sa talosagaina ai e le afioaga le komiti o fanua i tausaga ua mavae mo le malae taalo e lē gata mo tupulaga o Vaimoso, ae o tupulaga o o latou nuu tuaoi.
O le togatogo foi, ua faia ai atinae faatasi ai ma le toe tanu e nisi ua nofoia, ae o se atinae sa ave i ai le faamamafa a le pulega a alii ma faipule ona o le manatu e le gata ina aogā mo le ola faalenatura o meaola i le sami ae e puipuia mai ai foi le afioaga i taimi o mala faalenatura e pei o le tsunami.
Saunoa Manuleleua Leatuavao Tinifu Ioane, sui o le afioaga o Vaimoso, o le mataupu mo le atinae o le togatogo, sa oo ai i le afioga i le Alii Palemia, Tuilaepa Lupesoliai Sailele Malielegaoi, mo se fesoasoani.
O se tali na tuu ane mo le afioaga, o le mafai lea ona fesuiai o eleele mo i latou ua nofoia ia fanua (fesoasoani mai le Malo i le itu tau seleni mo i latou ua nonofo ai ae toe agai i se isi fanua e faamatuu mai e le Malo).
Na faaalia foi e le alii Palemia, e mafai ona fesoasoani le Malo i lea mataupu, ae o le mafuaaga lava o le ofisa o le Siosiomaga.
O fanua na faaalia ai se faagaulemalie o le afioaga o Vaimoso, o le togatogo ua nofoia i le taimi nei ma toe tanu e le afioga ia Fagafagamanualii Theresa McCarthy ma nisi o aiga ua nonofo ai.
Na tāpā se finagalo o Fagafagamanualii ma ia faaalia ai, o ia e ona fanua ia o loo faaseā agai i ai Vaimoso, e lē o ni fanua o Vaimoso.
E lei mafai ona toe faaalia se isi ona finagalo ona e lei maua se isi avanoa mo se faatalatalanoaga e faalautele mai ai sona finagalo i le mataupu.
O le mau a le afioaga o Vaimoso, e lē tatau ona toe tanu e nisi fanua o loo iai le togatogo ona e faapea o lea vaega e tele ina fagotaina ai le tugane ma le u‘a o se amio sa fai ma agaga i aso ua mavae i le afioaga o fanua e patino ia Vaimoso.
O le finau a le nuu, lea o le a toe talosagaina ai le Malo e ala i se tusi talosaga mo le Komiti o fanua ina ia talia ai se talosaga e taofia ai le toe tanuina o le togatogo ona o se atinae e toe fia faaleleia i totonu o le afioaga faatasi ai ma le fanua e toe faalautele ai le malae taalo mo tupulaga o le nuu.
