O le faletua o Monica Miller o se tamaitai o le atunuu ua leva tausaga o galue i galuega faatusitala ma faasalalauga i leitio i Samoa a o lei malaga ma lona aiga e faamautu i Amerika Samoa ma faaauau ai lana galuega i le Televise o le KVZK, sosoo ai ma le nusipepa o le Samoa News, ae ua avea nei ma faatonu o polokalame ma tala fou a le leitio o le KHJ i Amerika Samoa.
O ia le uluai tamaitai na filifilia e avea ma Pelesetene o le PINA o se faalapotopotoga na faatuina ma lesitala i Samoa mo galuega tau faasalalauga ma galuega faatusitala o nusipepa, leitio ma televise i le Pasefika.
O le taimi nei ua lē o toe lesitalaina i Samoa le faalapotopotoga ae ua lesitala i Fiti, ina ua vevesi le lotoifale o le faalapotopotoga e mafua i polokiki fetosoa‘i solo a ē sa taitaia muamua. O le tulai mai o Monica i le tofi pelesetene o se vaitau lea sa maopoopo ma malosi ai le faalapotopotoga, ae talu nei ona solomuli ma faamaamulu nisi o sui o atunuu mai le toe avea ma sui lesitala, ua fulisia sui o loo faagaioia ma pulea le PINA ia i latou mai atunuu Melenisia e pei o Fiti, Papua Niu Kini, Vanuatu, ma Solomona.
O le folasaga a le faletua o Monica i le fono a le PINA i Niu Kaletonia i le vaiaso na tea nei na ia muamua faia ai se saunoaga ua tatalo ai i le toe maua o se maopoopoga o le faalapotopotoga, ma ia toe faafoi i lana mau tausi o le faamalosia o le tāua o le saolotoga o faamatalaga ma le saolotoga e faatino ai le galuega a tagata faasalalau ma tusitala, le media i le Pasefika.
I le folasaga lava lea a le faletua na ia ta‘ua ai o taimi ia o le malosi o le faalapotopotoga sa finau ma galulue faatasi atunuu peitai o le taimi nei talu ona va le fogavaa i le lotoifale o le PINA ina ua o ese nisi sui ona ua lē tausisia e le faalapotopotoga lana mau tauave, ua foliga o se faalapotopotoga ua na o ni tagata o loo iai.
E pei ona silafia e le aufaitau o le PINA sa faafetoa‘ia pulega malo sa latou aiāina ma fau taiala ma tulafono e talepe ai le saolotoga e faatino ai le latou galuega aemaise le saolotoga e faaali ai lagona o tagata.
O le tulai mai o le fouvale i Fiti ma aiāina ai ma le saolotoga lea o tagata faasalalau ma tusitala aemaise o le tautua a nusipepa, leitio ma televise i lea atunuu, na molimauina le lei iai o se leo malosi o le faalapotopotoga, e mafua ona o i latou sa taitaia o tagata o Fiti.
O le fono a le faalapotopotoga ua mae‘a, lea sa faia i Niu Kaletonia, na aliali ai ni gaioiga faufau a i latou o loo saofafai i le laulau, ina ua latou sailia se fautuaga faaletulafono e mafai ai ona toe faaauau le latou nofoaiga. Na folasia lea fautuaga ma faaalia ai o loo mafai lava ona faatino lea tulaga e aunoa ma le toe faia o se palota e sailia ai se pelesetene ma ona sui mo le laulau o faatonu. O se faanoanoaga lea i le faalapotopotoga o le PACMAS sa faatupeina nisi o fuafuaga a le PINA i le fono i Niu Kaletonia, ona ua manino i lea taumafaiga le lē tausisia e taitai o le faalapotopotoga o taiala o pulega lelei. Ua iai le talitonuga o le a muta ai ma se toe fesoasoani a le malo Ausetalia i le PINA ma o le ā fesiligia ai ma lona toe faaauauina pea.
