Na ‘ausia e Samoa le tulaga lua i le HSBC Sevens i Las Vegas. Na sao Samoa i le taaloga ‘autu e sailia ai le siamupini, e pei ona fetaui ai ma Amerika. Na manumalo Amerika ile taaloga faaiu, ma saofai ai ile numera 1, ile faasologa o au o le taamilosaga.

E na’o le lua ta’aloga na faiaina ai Samoa, o le taaloga muamua i totonu o le Pool, ma le ta’aloga faaiu ma le USA. Ae o le sao atu o Samoa ile sailiga o le siamupini, o se vaaiga matagofie tele lea mo tagata Samoa uma i itu e fia o le lalolagi. O le faalua ai lea ona feiloai Samoa ma USA ile tausaga lenei, ae ua lua ai foi ma manumalo o USA ia Samoa. Na feiloai ‘au e lua i Hamilton na manumalo ai USA 34-14. 

E lei iai ma se avanoa o Samoa ia USA, o ‘ai o le taaloga e 27-0. E iloa ai iina le maoa’e o le taalo a Amerika ma lona tomai e faatonutonu le taaloga o le Sevens. Mai lava i le amataga o le taaloga na vaaia ai le lelei ma le saoasaoa o USA. 

E tele polo na fosi e USA ma mamulu ai avanoa na tau maua e Samoa. O le 90 pasene o polo na maua e USA, E lei foliga foi na tau sikoa Samoa i le taaloga atoa. 

E ui e tele ‘ai na manumalo ai Amerika, ae e le’o se tulaga e faasea ai i tama o le  ‘au, ona o Amerika ua i le numera tasi talu mai le taaloga amata i Dubai. A’o lea ua nofo to’atasi i le tumutumu o le apefai i le tu’ufaatasiga o ‘ai. 

O le finau malosi lava o le ‘au na maua ai le avanoa e tauva i le taaloga ‘autu. Na faiaina leaga Samoa i le taaloga amata ma Niu Sila  33-0. O le mea foi e tasi e pei o le taaloga ma le USA, e matua saoasaoa Niu Sila ma ma’oti le puipui ma le ma’ai o osofaiga. E lei mafai e Samoa ona tali le malosi o le ‘au a Niu Sila. Ae o le taaloga lona lua na feiloai ai ma Sepania o Samoa na manumalo 26-21 e lua sikoa a Tofatu Solia, David Afamasaga, Elisapeta Alofipo ma Johnny Samuelu. 

O le taaloga na soso’o ai ma Canada o le taaloga autu lea a Samoa, aua a pa’u ia Kanata e le sao atu i le ipu autu. A’o le avanoa a Kanata na maua lea i le taaloga ma Sepania na tutusa ai. E ui na faiaina Kanata ia Niu Sila, ae a manumalo ia Manu Samoa e sao ile ipu autu. Peitai, e lei solomuli le Manu Samoa, na manumalo i le taaloga 26-19, e lua sikoa a Alofipo, ma le ta’itasi a Alamanda Motuga ma Johnny Vaili. Ona maua ai lea o le avanoa o Samoa i le ipu autu. O se tala fiafia tele lea. 

O le QF o le Ipu na feiloai ai ma Ausetalia, sa tatau ona manumalo Ausetalia pe ana ova ana a’a. Aua e fa sikoa a Ausetalia i le na’o le tolu a Samoa, na maua e Johnny Vaili, Joe Perez, ma Siaosi Asofolau. 

O le taaloga na soso’o ai o le SF o le Ipu, na feiloai ai ma Argentina. O Samoa na muamua maua ona ‘ai 19-0. Na toe tali Argentina i le sikoa e tasi. 

O le taimi taua lea o le taaloga ina ua maua le sikoa a Argentina peitai na toe toto’a le finau a tama ma toe maua ai isi sikoa e lua o’o ai ‘ai 33-5. Na toe maua le sikoa mulimuli a Argentina, ae ua tuai ua sola Samoa ma le malo.

Ona tapena ai lea e feiloai ma USA i le taaloga faaiu. E ui na faiaina le Manu Samoa Sevens ia USA ae o se tulaga lelei tele le ‘ausia e le ‘au o le taaloga faaiu.  

Ua se’e ai nei Samoa e nofo i le tulaga #7 o le taamilosaga, ae pa’u mai i lalo Sikotilani ma Sepania nai luga atu o Samoa. 

Faaiuga o Taaloga 

Samoa 0 New Zealand 33 Pool 

Samoa 26 Spain 21 Pool 

Samoa 26 Canada 19 Pool 

Samoa 21 Australia 20 QF Cup

Samoa 33 Argentina 19 SF Cup

Samoa 0 USA 27 Final Cup