Ua lē manuia le finauga a le faalapotopotoga o le faaputuga tupe o le lumanai manuia o tagata le NPF i le faamasinoga o talosaga toe iloilo sa toe apili ai le faaiuga a le faamasinoga maualuga e faasino i se vaegatupe e tusa ma le $327,075 tala o se vaega o le penisione a le au matutua na gaoia mai le ofisa i apia ma e oo mai ile taimi nei e lei toe maua ina ua maea suesuega a leoleo.
O le faaupuina o aiaiga i le va o le NPF ma le kamupani inisiua sa la fai feagaiga mo le inisiua o meatotino a le faalapotopotoga, sa faia ai le faaiuga a le faamasinoga maualuga e le aofia i le aiaiga o le inisiua ona toe faaola le vaegatupe ua leiloa.
E lei faamalieina ai le NPF ma toe finau ai i le faamasinoga o talosaga apili lea ua aumai lana faaiuga ua saga faamausali ai le faaiuga ua mae‘a ona fofogaina.
O lona uiga ua moloaua ai lava lea vaegatupe tele o se vaega o le seleni e silia i le 4 selau afe na gaoia.
O le lē manuia o lea finauga ua toe faatonu ai e le faamasinoga o talosaga aplili le NPF e totogi i le kamupani inisiua o le Progressive insurance le $5,000 tala.
O aiaiga o le inisiua e na o tupe e teu malu i sefe tupe ma tupe e feaveai (transit) e aofia i le inisiua.
O tupe e afaina i ni gaioiga solitulafono e le teuina i sefe uamea poo le taimi e feaveai ai e le lavea i le aiaiga.
O tupe na gaoia sa teu i se tasi o potu o le ofisa o le NPF e gafa ma le totogiina o le penisione a le au matutua.
E tusa ai ma molimau a leoleo i le mea na tupu, na gaoia le silia i le $420,000 mai totonu o le potu sa teu ai pusa uamea ua mae‘a ona fafao i ai teutusi o penisione a tina ma tama matutua.
E oso le gaoiga ae o le taeao e sosoo ai alu i tua le totogiina o le penisione.
Na muamua suesueina le mataupu e le faamasinoga maualuga ma faia ai le iuga e le mafai ona toe faaola seleni ua le maua mai le gaoiga ona o aiaiga. Lea ua toe faamausali i le iuga a le faamasinoga apili.
O se tupe tele e lei toe maua ma o loo tele lava i ai faamatalaga salalau, peitai e le o mafai ona iai ni faamatalaga o atagia mai ai e moni ia masalosaloga.
O le teena mai o le finauga a loia a le NPF o le mutaaga foi lea o le finauga.
