TRESPASS ACT 1980

Ona o le tele o tatou tagata e o i lotu, ua mafua ona ou ta‘ua lenei faamasinoga e tusi ai le tatou pepa i lenei vaiaso ona e tele mataupu e tatau ona silafia e tatou tagata lotu (Public  Interest).

O le vaiaso nei ua ou faauluina ai se tagi tele a se Ekalesia i le High Court i Aukilani, ma o le a valaauina i le aso 14 Me 2012 lea tagi e faatulaga ai se aso e fai aloaia ai le faamasinoga o mataupu ia e i luga o le tagi lea.

Ona o le matuia o ni tulaga ua oo i ai nisi o tagata matutua ma fanau a le Ekalesia lea ou te tu ai, o lea ua faila ai se tagi tele i luma o le High Court e faasaga i le (1) Ekalesia aoao o lea Ekalesia; (2) E faasaga i le lala (branch) o lea latou te tauaveina galuega a le Ekalesia Aoao i totonu o Aukilani; (3) Tagi ua molia ai le faifeau lava ia; (4) Tagi e faamaoti mo ni tagata e toatolu na sainia Notice of Trespass ia na ave e faasa ai tagata o le Ekalesia lea ou te tu ai, i le o atu e faaaogā le falesa e lolotu ai; (5) Tagi faasaga i le ofisa Loia lea na ou tusi i ai e sese le Trespass Notice lea e saini ai le faatonuga a le latou ofisa loia. E lei amanaia e le ofisa loia papalagi la‘u tusi ma foliga mai e aamu.

• O le mataupu tāua, o le tagi i le High Court ona ua solia e le faifeau o le lotu ma nisi tagata se toatolu aiā tatau a tagata lotu e o ai i le lotu, ona o latou o “occupiers” tagata o le lotu e iai a latou aia tatau i le tulafono, e latou te faaaogāina ai le falesa ma meatotino a le lotu.

• O le isi vaega o le tagi, o le faaaogāina sese e le faifeau ma tagata lotu ia ua su e toatolu; Trespass Notices e latou te valaau ai leoleo e faasā ma tutuli e leoleo ia tagata lea ua ave i ai Trepass Notices.

• O le vaega e tolu o le tagi o le nofo o le faifeau ma tagata ia latou te faifaimea faatasi, ma faasā tiakono o le itu lea ou te tu ai, ona toe o atu i ni fono a le lotu (session meetings).

• O le vaega fa, o le faasāina e le faifeau ona lauga se faifeau tamaitai ua maua tofi faifeau i le Univesite faafaifeau, ma ua iai lona laisene e lauga ai ona o ia o le faifeau fesoasoani.

• Ona o le matuia, matagā, faamaualuga, ma faamasiasi nei tagata lotu ua afaina, o lea ua tagi ai nei tagata e totogi tupe mai i le va o le $200,000.00 ma le $100,000.00 i latou, e le faifeau ma tagata uma o le Ekalesia faapea ma le Ekalesia aoao ma le latou lala i Aukilani, talu ai Trespass Notices ia ua ave e faasā ai tagata ona tapuai i le Atua i totonu o le falesa i Aso Sa.

 

Manatua, o le fale faamasino e faia faaiuga. Afai o le tali e ioe, o le faamasino e na te faia pe fia tonu le tupe e tatau ona totogi e le tagata na faia le mea sese i le tagata ua afaina.

B. O le isi mataupu e sili ona taua i lea faamasinoga, ua ou fesiligia faamasino i lalo o le Declaratory Judgement Act poo le ā i so latou iloa, i le uiga o le upu papalagi lea o le “Occupier” i totonu o Ekalesia.

E tāua tele ia i tatou Samoa ona faamaoti mai se faaiuga a le High Court mo lea vaega o le tulafono, ona e le o manino, ma e leai foi nisi faamasinoga muamua ua ou mauaina, sa talanoaina ai lenei mataupu i fale faamasino o Niu Sila.

Ae i le taimi nei, o lea ou te faatali i se tali mai a le fale faamasino; sa talosagaina a‘u, ma ua ou taliaina e ave le tagi i le High Court ona ua afaina soifua maloloina o tagata matutua i lenei mataupu, ua afaina fanau laiti e lē fia vaai i matua o matua o mafatia i luma o leoleo.

O la‘u suesuega ma lo‘u iloa faaloia, e leai se aia tatau a se isi o se Ekalesia ma le faifeau foi latou te faaaogā ai le tulafono lea e ta‘ua i luga e ave ai ni tusi e faasā ai ni tagata o le Ekalesia e o atu e lolotu i le falesa.

E leai foi se aia a se faifeau ma nisi o le Ekalesia e telefoni ai leoleo e o atu leoleo e aveese tagata o le Ekalesia mai totonu o falesa, i taimi o sauniga lotu.

E tāua tele lenei mataupu ona o falesa sa tatau ona fai ma fale e sulufai i ai tagata matutua ma tamaiti, e tapuai i le Atua. Ae pagā lea ua o atu i le falesa ae ua fai le falesa ma fale e o atu i ai leoleo e aveese tagata.

Ou te lei maua foi se tulafono i le Tusi Paia poo le tulafono a le malo o Niu Sila poo Samoa, e faapea: o Faifeau o Lotu e iai a latou aia tatau ma le pule, e pulea ai tagata e tatau ona o atu e faaaogā le falesa, ma tagata e tatau ona tutuli ese i fafo pe a o atu i le lotu.

Talosia ia maua ni faaiuga e aogā mo le lumanai lautele o le galuega a le Atua, i lenei faamasinoga.