Toulu pea le Aufaigaluega i vaivaiga o le olaga

Savalinews

E lei mamao atu na faatea ai nisi o faifeau o le Ekalesia Metotisi ina ua mae‘a ona suesueina ma faamaonia moliaga o nei faifeau.
O se tasi o faifeau o se mataupu e uiga i se tamaitai o lana aulotu ua maua le la faanunumi ma le alii faifeau.
O le isi sa tausia se tasi o Matagaluega i le Sinoti a Salafai Sisifo ua malolo leai ni tofi i mataupu tau seleni a le aulotu.
Ua mae‘a foi ona iai suiga mo ia nuu ma o latou faifeau fou ua tuuina atu e galulue ai ma osia feagaiga e pei ona masani ai.
O le vaiaso talu ai na toe lagona ai foi le iuleo lava lea mai le Ekalesia Metotisi ina ua faamalolo le faifeau na tausia se tasi o Matagaluega i le Sinoti a Apia.
I se molimau na tuuina mai e faapea, o vaivaiga lava o le olaga ua toilalo ai le faifeau. Na mafua lea tulaga ina ua maua e le faletua o le faifeau se feau tusitusia i luga o le telefoni a le alii faifeau.
O se ripoti e faapea, na vili e le tuagane o le faletua le numera o le telefoni ma maua ai loa le ulaleaga lea e faalavelave i le ulugalii a le faifeau ma le faletua.
O le faifeau lenei sa tausi nuu i se tasi o nuu i Savaii ma e lei mamao atu na siitia mai ai i Upolu nei i le nuu e pei ona iai.
I se tasi o ripoti e faapea, o le ulaleaga lea sa fai si la faanunumi ma le faifeau, o se tamaitai o se tasi o pitonuu o le Itumalo lea na tausi nuu muamua ai le faifeau.
Ua mae‘a nei ona tofia le faifeau fou mo lea nuu ma ua fuafua o le vaiaso muamua o Iuni e osi ai le feagaiga a lea afioaga ma le latou faifeau fou.