O le faletua o Fetu Tiatia o le tuaa lea o se tasi o tamaitai sa tausinio i le sailia o se Tausala o Samoa.
O loo galue nei o se tusitala mo Tala Fou a le leitio o le Talofa FM i Savalalo. Ina ua feiloai tusitala ma tamaitai e toaono sa tauva, sa fesili ai Fetu i le tausala Samoa mai Niu Sila, poo le ā sona lagona ae manumalo pe faapefea ona ia tauaveina le tofi pe afai e faalēlelei lana tautala i le gagana Samoa.
Fai mai molimau a nisi o tusitala sa auai i le feiloaiga ma teine tauva, sa vaaia le tuai tali ane o le tamaitai tauva mai Niu Sila, ona ua pei e taia lona lagona sagisagi ane e fia faailoa ana taumafaiga mo le tauvaga, i se fesili e pei ua luitauina ai lona tulaga o se tamaitai Samoa.
Sa tutulu o ia ma taumafai e tali ane, ma sa ia tautino lava e faalēlelei lana tautala i le gagana Samoa, ae o le a taumafai pea i le mea silisili e gata ai pe afai e faapaleina o ia.
Sa ia ta‘ua foi o se tasi lava lea o tulaga e fetaiai pea ma alo ma fanau a Samoa sa soifua a‘e i Niu Sila.
Mo le silafia e le au faitau e faapea foi isi fanau a le atunuu sa fananau i isi atunuu.
E lē faapea o le a avea lea tulaga faigata i le gagana Samoa e taofia ai le filifilia o se tamafanau tamaitai a le atunuu e tauva ae faapaleina i le Tausala o Samoa.
O le finagalo lea o se tasi o sui o le komiti o le tauvaga. Ua lagona ai le faanoanoa o lea sui i le fesili a le tamaitai tusitala, ona e foliga o le tauva o lona alo teine i le tauvaga ua ia saili ai se auala e osofai ai se isi tamaitai tauva.
E lei maua se feiloaiga ma le tamaitai tusitala na faia le fesili, ae na faaalia e le isi tamaitai o loo galue foi i le vaega o Tala Fou a le Leitio Polenisia, e leai se tulaga faaituau pe na faaletagata (personal) o le fesili na tuusa‘o i le tamaitai tauva.
E leai foi ni aiaiga o galuega faatusitala na solia i le faiga o le fesili.
Na pau le itu sa faaseā ai nisi tusitala matutua, ona e foliga ua vave ona osofai e nisi manatu faaalia le fesili a le tusitala ae o loo faatino lana pitolaau.
O le taunuuga o le tauvaga ua manumalo ai le tamaitai o Jolivette Menime Ete sa lagolagoina e le MacDonald’s restaurant, pito i ai le Tausala o Samoa mai Niu Sila o Angelica Wright, ma e tāua lona tulaga ona a iai se faaletonu i le faatinoga o tiute o le tamaitai ua manumalo, o le a otometi lona tauaveina o le tofi ma le pale o le Tausala o Samoa.
