“Afai foi e fevaevaea‘i se malo, e le mafai ona tumau o lea malo. Afai foi e fevaevaea‘i se aiga, e le mafai ona tumau o lea aiga.” (Mareko. 3:24-25).
Faatoa uma lava na tuli e Iesu le temoni mai le isi tagata, ae alalaga le au-Faresaio, o le agaga o Pelesepulo o loo tuli ai e Iesu temoni. Ona faasa‘o lea e Iesu le valea ma le pogisa o le au-Faresaio i lona fetalai atu, e mafai faapefea e Satani ona tulia o Satani?
O lea ua folasia e Iesu se aoaoga lelei, soo se mea e iai le feitaga‘i, e lē manuia. Soo se aiga ma soo se malo e fefulituaa‘i, ma lē fealofani, e lē taunuu i se lelei. Soo se aiga, malo ma soo se ekalesia e fevaevaea‘i, e lē tumau.
O le fealofani, o loo faaata mai e le Atua ia te ia lava. I le aiga-Atua, e eseese faiva ae fetausia‘i. O le mea lea e ta‘u ai le Atua o le Tasi-Tolu-Paia. E tolu ona Peresona ae tasi lava le Atua.
E lē talia e le toatele lea aoaoga, auā e taumafai e faamatala i gagana a tagata, ae na o le Atua lava na te mafai ona faamatalaina. E lē mafai foi e le mafaufau o le tagata e lata mai ona fuafua pe faapefea lea mea, ae ua faaataata mai e le Atua mo le tagata.
E iai nai manatu e fia fesoasoani atu ai mo le tausia o le filemu, ma ia avea o tatou aiga o aiga malolosi, ni ekalesia manuia e mafai ona aafia ma manuia ai isi o loo matamata mai poo latou e lē talitonu i le faatuatuaga faa-kerisiano lea tatou te taupati ai.
E tatau ona faatāua i o tatou manatu le tausia o le fealofani, ma mautinoa o le fealofani e afua mai le Atua. O le toe poloaiga lava na tuu e Iesu i lona ausoo, o loo faamauina e Ioane e faapea: “O le poloaiga fou ou te tuuina atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o o‘u so‘o outou, pe afai ua outou fealofani.” (Ioane 13:34, 35).
Afai tatou te maua lelei le ute o le fetalaiga lenei a Iesu, ona lē toe iai lea o se taumate i le finagalo o le Atua e faatatau i le fealofani. E lē faapea o le a leai ni eseesega i manatu ma taofi. O eseesega, o se vaega o lo tatou olaga i aso fai soo. E eseese faleaoga na aooga ai, eseese aiga na faafailele mai ai, eseese foi ekalesia sa amata mai ai.
A o le faatinoina ma le faaalia o eseesega e tāua tele. Silasila foi, e tele ina faaaogā e tagata le ita e momoli ai ni manatu, ma faamata‘u ai le nofo lelei o isi ma finau ai ia malo ona manatu. E tele aiga ma ekalesia ua masofasofa ona ua faaaogā le ita e fai ma auupega.
Ma le isi, o le soona saunoa i le agaga faamasinosino, o le tasi lea mailei ua manunu ai le va fealoaloai o le toatele. O i e afua ai le tele o misa ma le lē nofo fealofani o aiga ma ekalesia. Tatou te lē taofiofi ma manatunatu alofa, e leai se isi e atoatoa, ae vave ona tatou osofai se isi tatou te lē fiafia i ai, ae lē faavae manatu i mataupu o talanoa.
Fai mai le anāna a tamaiti, taalo i le polo. O lona uiga, ua taalo leaga, ae tuu le polo. Ia ave manatu e faatatau i le mataupu, ae aua le faatatauina i le tagata. O i tatou te sese ai, ma tupu ai le lē fealofani. Auā poo le ā lava se manatu lelei, afai e te ita i le tagata o loo aumaia se manatu, tainane lava e manaia, ae leaga lava ia te oe.
O isi e lē ave i luma o latou manatu, ae taamimilo i tua ma talanoa solo i tagata e lē malamalama i mataupu poo polokalame sa talanoaina, ma lūlū le fatu o le fevaevaea‘i i loto o tagata.
Ae a eseese manatu, e faapefea la ona tausisia le filemu? Ia faaali manatu faavae i le alofa, aua le tusitusi lima, ae momoli i le ava ma le agaga maualalo. O i e taitaiina ai tatou i le nofo fealofani, tusa lava pe tatou te taofi eseese.
O le fealofani, o le faailo o le iai o le Atua ia i tatou, ae o le fevaevaea‘i e mai le tiapolo. Soo se mea e iai le feūta‘i, e faapogai mai le tiapolo. E faapefea ona taumafai e aapa atu i le lalolagi o leiloloa, pe afai tatou te tauaimisa ma fefulituaa‘i? Faapefea ona faamatala le alofa o le Atua, pe afai e lē atagia i totonu o o tatou aiga ma faigalotu?
E manaomia e tatou uma le loto pulea, ma aveese uiga e faatupu ai le feitaga‘i. Aua le manatu faapito, ola faufau pe faualuga, auā e iai ē popoto atu ia te oe, ma manatu e sili atu i ou manatu.
O le faitala ma le suesue tala o se vaivaiga taatele, e lē na o tina, ae ua silimusa alii. E tatau ona mafaufau lelei ma manatu alofa i isi. Ia manatua, o le mea e te lūlū e toe selesele mai. A faatuputupu vevesi, e te selesele mai le inosia ma le amusia.
Fai mai Tavita i lana Salamo: “Faauta, o le mea e matuā lelei ma le matagofie lava, pe a nonofo faatasi o uso.” (Salamo 133:1). O le faamatalaina o le fealofani, ua faaaogā ai e le faisalamo ni upu e faamatalaina ai le tāua tele o le fealofani. Afai tatou te lē o faatupuina le fealofani, o lona uiga o loo tatou faatupuina le feaina‘i ma le fevaevaea‘i. E manaia lo tatou manatunatu taitoatasi poo fea o mea nei o loo tatou faia. Soifua.
