O Damian McGrath sa avea ma faiaoga o le au lakapi taitoafitu a le Manu Samoa

O Damian McGrath sa avea ma faiaoga o le au lakapi taitoafitu a le Manu Samoa

O le tagi o se su a Damian McGrath sa avea ma faiaoga o le au lakapi taitoafitu a le Manu Samoa, o loo faasaga i le Ofisa sili le susuga Faleomavaega Vincent Fepulea’i, ma le Iuni Lakapi a Samoa. O le Ofisa sili o loo tuuaia i le tagi i lona fai oni faamatalaga i se lipoti a se nusipepa, ua finau Damian ua faaleaga ai lona tagata. O le Iuni Lakapi o loo su i le faamuta o le konekarate a Damian ose tagatanuu o Egelani i Peletania ae o loo faamautu nei i le atunuu o Kanata. O Mati o le tausaga e 2016 na amata ai le konekarate a Damian i Samoa mo le lua tausaga. Peitai o Setema o le tausaga lava lea na toe faamuta ai lana konekarate.

O le amataga lea o le mataupu ma oo ai i le faamasinoga maualuga le su. O le valaauina o le mataupu na tuu atu ai se talosaga a le iuni lakapi a Samoa ma le Ofisa sili o le Iuni ina ia totogi muamua e Damian se vaegatupe e 90 afe tala, e faamautu ai lana finauga e ala i lana su. Na mafua lea talosaga ona e le ose tagatanuu o Samoa ma e nofo foi i fafo. Na suesue le talosaga e le faamasinoga maualuga ma aumai ai le faaiuga e 20 afe e totogi i le iuni ae 10 afe e totogi i le Ofisa sili, peitai na toe finau le loia a Damian o Sarona Ponifasio i le faamasinoga o talosaga apili ua fai si maualuga tele o le tupe o le a totogi.

I le silasila a le faamasinoga apili e sa’o lelei le faai’uga a le faamasinoga maualuga. Muamua o le o loo tagi e le o se tagatanuu o Samoa, e le nofo foi i Samoa ma e leai ma ni ana aseta o i Samoa. O aiaiga faaletulafono e mafai ai e le faamasinoga ona faia se poloaiga e totogi ese tagata mai fafo se tinoitupe e faamautu ai lana tagi lea e ta’ua o le surety, poo se tupe e puipuia ai le itu o loo faasaga iai ni tuuaiga ise mataupu tau su. O loo finau le iuni lakapi ma le Ofisa sili e matua leai ni mau malolosi e faamautinoa ai e manumalo le finauga a Damian pe a oo ina su’esu’e lana mataupu.

O le isi lea o mafua’aga o le talosaga a le Iuni ma le Ofisa sili e totogi muamua atu se tinoitupe e le itu tagi ona faato’a faagasolo ai lea o taualumaga o lana su.

O le susuga i le alii loia o Semi Leung Wai o loo tulai mo le Iuni Lakapi a Samoa ma le Ofisa sili o le Iuni le susuga Faleomavaega Vincent Fepulea’i.