O loo faia nei suesuega a leoleo i le gaoia ai o le faleoloa supamaketi o le Farmer Joe i Vaitele-tai i le po o le Aso Sa o le toetu, ua tea atu nei, e pei ona faaalia e se tagata faigaluega na gaoia ai oloa e pei o fagu malosi, ma taumafa eseese.
O le sefetupe a le faleoloa e faapea e $40 afe sa teu ai e lei mafai ona tatala pe sii e le au gaoi ona na maua atu o loo i totonu o se pusaaisa tele o le faleoloa. E iai le talitonuga na sii i ai le sefe tupe e taumafai e tatala ai ona e le lagona le pa‘o pe a tapuni le pusaaisa tele, peitai na fiu e le matala.
O se faamalama e faapea e tu tonu i le vaega e iai le faleui o le faleoloa i le pito i tua na feosofi ai le autalepe fale. O loo masalomia pe o ni tagata faigaluega poo nisi foi sa faigaluega muamua i le supamaketi na faia le gaoiga, ona na iloa tonu e le augaoi le ki e titina ai le mea pueata o le faleoloa e iloa ai se gaioiga solitulafono.
Ua maua e leoleo se faamatalaga mai se fale taavale laitiiti laupasese e faafesagai ma le faleoloa e faapea e toalua ni alii talavou na malaga i se taxi a le fale taavale i le po o le Aso Sa na faia ai le gaoiga i se taimi ua tuneva le afiafi.
O ia alii sa la tauaveina ni ato lapopoa ma e masalomia o oloa ia na gaoia na fafao ai. Faaalia e se molimau e leai se tupe na totogi ai le taavale laititi ae o se pisupo tolu pauna na ave i le ave taxi. Faaalia foi e le molimau na ave lea aualii ua tuu i le va o le Apia Park ma le nuu o Moataa.
E oo mai i le taimi nei e lei maua lava poo ai na faia le gaioiga ona o loo tau sailia pea e leoleo.
O se tasi o lomiga a le tatou nusipepa na faailoa atu ai se isi gaoiga na faia pupula i le ao e se tina talavou, ae na maua i mea pueata, peitai o le gaoiga lea i le aso ua mavae, o le po na faatino ai. E le o iloa le tau aofai o oloa a le Farmer Joe i Vaitele-tai ua gaoia.