Totogi lava pili aoga tulagalua ekalesia Katoliko

O le a totogi lava pili o fanau i aoga tulagalua a le ekalesia Katoliko ma ua le ausia ai le manulauti o le polokalame o le aooga fua o fanau laiti i aoga tulagalua e pei ona naunau i ai le Malo aemaise o le autu foi lea o le fesoasoani e $5.8 miliona a Malo o Ausetalia ma Niu Sila. Ua faaalia e le faatonu o aoga a lea ekalesia, le afioga Aeau Chris Hazelman, o le fesoasoani ua faasafua atu e le Malo ua mafai ona faaitiitia ai tupe alu a aoga taitasi ma o se laveai taua lea, peitai e le o mafai ona gafatia ai le tasi o tulaga taua o le totogi o faiaoga e pei ona tapu mai ona faaaoga i ai se seleni o le polokalame.
O le fesoasoani ua faatulaga mai o le a tuusao lava i pili o tamaiti, ae o le a le toe totogiina le pili atoa e matua ae ua na o se vaega. O lona uiga o le isi vaega o le pili masani o le a fesoasoani i ai le selau tala o le pili o le tamaititi i le tausaga atoa ua aiaia i lalo o le polokalame.
O le fono a le ofisa o aoga a le ekalesia, ma faiaoga o le aoga maualalo a Sagata Maria i Savalalo faapea ai ma matua o loo aoaoina a latou fanau i lea aoga tulagalua a le ekalesia katoliko na faamalamalama ai ma le polokalame a le Malo, lea foi na tufa iai ma le pepa o le faaaoga o tupe o le fesoasoani na saunia e le matagaluega o aoga a le Malo.
Faaalia e le faatonu o aoga a lea ekalesia le afioga Aeau ua malamalama lelei matua ma ua manatu nisi e manaia lava le tautiga pea o matua e fai so latou sao i pili o fanau aua o le latou pito laau tausi lea ina ia filiga ma tauivi ai pea tamaiti i le aoga.
O le a malaga taamilo le faatonu e feiloai ma matua ma faiaoga o aoga tulagalua uma a le ekalesia e faailoa i ai lenei fuafuaga. E valu aoga maualalo a le Ekalesia Katoliko lea e silia i le 3 afe fanau o loo aoaoina ai. E pito toatele fanau o loo aooga i Malisi i Mulivai ma Sagata Maria i Savalalo lea e i le va o le 400 ma le 500 tamaiti o loo aooga ai.

Maua e aoga Katoliko le $1.5miliona
O aoga a le Ekalesia Katoliko o loo pito tele lona sea i le tufatufaga o le $5miliona tala o le fesoasoani a le Malo mo lenei tausaga o loo faamanuaiaina ai aoga uma a ekalesia eseese i le atunuu, o aoga tumaoti poo private schools, o aoga faataitai, faapea ma aoga mo fanau e iai manaoga faapitoa, aemaise o aoga o loo faaauau ai le olaga suesue o fanau i isi tomai faapitoa e pei o aoga musika.
E silia i le tasi ma le afa miliona le tupe ua maua e aoga a le Katoliko i se aofaiga e tasi le miliona lima selau fitu sefulu iva afe, tolu selau fitusefulu lima tala ($1.579,375). O loo pito i ai aoga a le Ekalesia Metotisi e $494,000 aoga a le Ekalesia Aso Fitu o le Toe Afio Mai e $253,000, ma le aoga tumaoti a le Robert Louis Stevenson e $211,000. O isi aoga e maua le tai selau ma ona tupu afe tala ma faasolo ane ai lava i le vaegatupe pito maualalo e $4,000 mo le aoga o tomai tau i le vaneina o laau ma le tusiata, le Beautiful Expression of Nature o loo i Lelata.
O le afioga i le Palemia na ia tauaaoina atu siakitupe mo aoga taitasi ua agavaa i le fesoasoani i se sauniga sa faia i le potu fono o le kapeneta i le maota o le Malo o loo i le eleele fou. O se fesoasoani taua lenei o loo toomaga pea i ai aoga a ekalesia, ma aoga tumaoti faapea aoga faapitoa ma aoga faaauau i tausaga taitasi. Ua talafeauga tonu le taimi ua maua ai le fesoasoani ma le toe amatalia o lenei tausaga faaleaoaoga.