O se tasi lea o vaega o le anavatau na tele ina faatalanoaina e tusitala i le fono ua mae‘a atu ma le Tautua Samoa.
O le faalua ona totogi o le penisione a tagata matutua i le masina pe afai e tulai mai le Tautua Samoa i le foe o le Malo.
O lea fesoasoasni na ta‘ua e le Taitaifono o le Tautua Samoa, o le a saili mai le seleni e faatino ai, i le faaputugatupe a le NPF.
“Ae ā le la e tele tupe a le NPF, o lea ua amata ona fau lona fale fogafale tolu, e alu ai le $50 miliona tala Samoa, faafefea la ona le iai se tupe mo le faatinoga o le penisione,” o se faaaliga lea a Afualo Dr Wood Salele ina ua fesiligia pe faafefea ona faatupe lea siitaga.
O lenei fuafuaga ua vaavaai ai le Tautua Samoa i le totogi tailua vaiaso o le penisione a tagata matutua.
O le taimi lenei e ta‘i masina ma totogi atu le penisione ma e $125 tala Samoa le penisione o loo maua i le taimi nei.
O lona uiga a ta‘i $125 e maua i le lua vaiaso a tagata matutua e $250 lea o le a maua i le masina. E to‘a 9000 tagata matutua mai i le 65 tausaga agai i luga o loo maua lenei fesoasoani mai i le Malo i le taimi lenei.
Faaalia e Tuiloma Faitasi Gaee, o loo faauluulu i ai le Ofisa o Penisione a Tagata Matutua, e $16,000 lava o loo alu i tagata matutua i le tausaga atoa.
“O le tupe lea o loo aofia ai le penisione lea ta‘i $125 a le tina poo le tamā foi ma totogi ai e le Ofisa nei le Kamupani Vaa o Samoa atoa ai le Soifua Maloloina auā e feoai fua le au penisione i luga o vaa a lalo pe a fia malaga i le va o Savaii ma Upolu.
O loo maua foi a latou fualaau ma vailaau pe a tala i le falemai o loo totogi atu la i le seleni lenei lea fesoasoani.”
O le fuafuaga la a le Tautua, a taunuu e $32 miliona tala le tupe o le a alu i penisione a tagata matutua ae e pei ona ta‘ua e Tuiloma Faitasi, o le tupe mo le faatinoga o le penisione o loo sau sa‘o lava mai le Malo.
“E ave lava le matou budget i le Malo, e screen ona ave loa lea i le Kapeneta ma le Palemene auā le faamaoniga ma e lē o se tupe mai i le NPF lea e faaaogāina”.
“E lē mafai ona matou tago fua i le tupe a le NPF e faaaogā auā o saofaga ia a le atunuu,” o se faaaliga lea a le Alii Pule o le Penisione.
Ae o le finagalo o le Tautua Samoa, afai e pale mai i le palota o Mati i le aso 4, o le a vaavaai lelei i se auala ina ia mafai ai ona totogi faalua le aofai lea o penisione i tagata matutua.
“E leai lava ma se mea o le a taumafai ai e faaaogā fua le lafoga o loo aoina e le Malo i le penisione. O loo lelei le tupe maua a le NPF ma e mafai ona faatupe mai ai le fesoasoani lea mo tagata matutua”.
