E silia i le ‘afa miliona tala ($765,807) se vaegatupe ua faatonuina le pule ma kamupani o le Singapore Motors i Vaitele, ma se tasi o Faatonu o lea kamupani faatau taavale, o ia foi o le tausitusi le susuga Laulu Dan Stanley, e totogi atu i le kamupani faatau taavale o le Alnima Motors ona o le faaleagaina o lea pisinisi i ni gaioiga e lē tusa ai ma tulafono o aiaiga o pisinisi ua lē tausisia ma usitaia.
Ua soli foi e i latou aiaiga ma tuutuuga faaletulafono i le va o tagata faigaluega e sainia ni konekarate ma lē e ana le galuega poo le employer.
O le vaiaso ua mavae na aumai ai le faaiuga a le Faamasinoga Maualuga, i le tagi a le Alnima Motors e mafua i le aveesea faamalosi o ni taavale a lea pisinisi na aumai i Iapani ma Singapore e faatau, ma le aveesea i se auala faasolitulafono o meatotino a le kamupani e pei o tusi lisiti ma api o faamaumauga o le faagaioia o le pisinisi faatau taavale.
O se alii Pakistan e suafa ia Fareed Arshed e iloa tele i lona sufa o Babar na faatūtū i ai le tagi, ona o ia lea sa ia pulea le faagaioia o le faatauga o taavale a le Alnima, faapea ma le susuga Laulu Dan Stanley, sa galue i se tulaga i lona tausia lea o tusi o faamaumauga tau tupe a le kamupani.
O le kamupani o le Singapore Motors le isi na faasaga i ai le tagi, ona o le pisinisi faatau taavale lea na faavaeina e Babar ma Laulu a o galulue pea o ni tagata faigaluega a le Alnima.
O le faavae lea o le finauga a le itu tagi, i le soli e i laua o aiaiga o a la galuega i le faatu o le isi pisinisi faatau taavale e tauva ma le Alnima, ae o loo iai aiaiga o a la galuega ma lea kamupani.
I molimau a le itu tagi na tuuina atu na faaalia ai, ni tulaga lē manuia na aliali mai i le lē maua o nisi o faamaumauga o tupe faaalu, ma tupe sa toe totogi atu i se kamupani i Singapore ma Iapani na aumai ai taavale sa faaaogā muamua poo used cars lea na faatau e le Alnima.
O le aveesea o taavale mai le lotoā a le Alnima na finau le itu tagi na toe faatau e le Singapore Motors e aunoa ma se faatagaga a le itu tagi na auala mai ai ia oloa i le atunuu.
O le Alnima na latou talosagaina le pemita e faigaluega ai Barba i Samoa ma o latou foi na iai le vaaiga o le nofoaga sa faamautu ai lea alii mai fafo.
O le aso 4 o Iuni o le tausaga e 2009 na faavae ai le Singapore Motors lea na amata i Fugalei ma sosoo ai ma se lotoā i Savalalo na la‘u i ai taavale.
O taavale uma sa amata ai lea pisinisi o meatotino a le Alnima, peitai na faagasolo le pisinisi fou faatau taavale e aunoa ma le toe iai o se silafia o le pulega o le Alnima i tupe na maua i le faatauga o taavale.
Na iloa foi i se sailiiliga a lea kamupani le vavaeesea i se auala solitulafono o taavale mai le latou lotoā i Lepea, ma ave i le lotoā a le Singapore Motors.
Na faaalia e Barba poo Fareed i lana molimau o ia na faamavae mai le Alnima peitai o faamaumauga o lana konekarate faigaluega na tuuina atu e avea ma mau a le itu tagi sa talitonu ai le faamasinoga, sa galue pea lea alii mo le Alnima ona o ni tupe na ia lafo i fafo i le vaitaimi na ia ta‘ua na faamavae ai, o loo ia faaaogāina lava le igoa o le kamupani o le Alnima i Lepea.
O se alii mai fafo e suafa ia Singh o se tasi lea o faatonu o le Singapore Motors, ma sa malaga mai o ia Samoa i le vaitaimi o Mati o le tausaga nei, peitai na ia toe tuua Samoa ae toe o ni aso faia le faamasinoga.
O ia lea sa finau Barba sa faatonuina le faatuina o le pisinisi fou, ma ia aumai i ai taavale ma isi meatotino mai le Alnima.
Peitai ua lē mafai ona faamaonia lea finauga a le Barba ona ua lē mafai ona molimau lea alii.
O faamaumauga na tuuina atu i le faamasinoga na talitonuina ai o Singh e leai sona aia i le kamupani, ma e leai foi sana pule na te faia se fesuia’iga i le va o pisinisi e lua.
Ua faamaonia e le faamasinoga vaega uma na finauina e le Itu tagi ma ua faatonuina le alii o Barba e totogi le :
• $50,000 o le leiloloa o mea faigaluega ma tupe faaalu ua lē maua ni faamaumauga.
• $85,000 o tupe na toesea mai le teugatupe i le faletupe o le ANZ i le aso 2 o Iulai 2009
• $90,219 o tupe Sigapoa na totogi faasili i le kamupani na aumai ai taavale mai lea atunuu e ta‘ua o le Balwin Exports
• $460,588 o le totogi o le paleni o le tau o taavale na aveesea faamalosi mai le lotoā a le Alnima
• $50,000 o exemplary damages
• $10,000 e totogi e La’ulu Dan Stanley mo general damages
• Ma le $20,000 e totogi foi e La’ulu mo exemplary damages.
