E $8,000.00 tupe a le Yasaki na gaoi
O i latou e tauaveina tulaga maualuluga i ni galuega e tagofia ai tupe, a oo ina aafia i le faia o se soligatulafono e pei o le lima tagoese, e iloa ai ua latou tatae le faatuatuaga o ni tagata e pulea se kamupani poo se pisinisi na ave i ai. O le faavae lea e faia ai e le faamasinoga le faasalaga e tatau ona faia mo i latou uma e molia atu i le solitulafono o le gaoi a o avea ma tagata faigaluega, (theft as a servant). E toalua ni tamaitai ua nofosala nei i le falepuipui i lea moliaga ma sa aafia ai ni seleni tetele, ae oo ane i le taimi na lau ai o la iuga e lei iai lava se taumafaiga e toe totogi seleni na la toesea.
O le Aso Faraile, 20 o Fepuari 2009 na fofogaina ai e le afioga i le faamasino sinia o le Faamasinoga Maualuga, Lesatele Rapi Vaai se faasalaga mo le tamaitai o Morinda Isaia, 28 tausaga o Moataa, e mafua i se vaegatupe e tusa ma le $8,000 tala na gaoia a o galue i le kamupani o le Yasaki Samoa i Vaitele. E tolu moliaga o le gaoi a o avea ma tagata faigaluega faasaga i le tamaitai na faamaonia e le faamasinoga, ina ua maea ona suesueina molimau a le itu a leoleo, lea sa molimau ai nisi o le pulega o le kamupani.
O le va o le masina o Iulai e oo i le masina o Setema o le tausaga e 2006 na tulai mai ai le faaletonu, a o avea le ua molia ma se tasi o tagata faigaluega sinia poo se supervisor, sa feagai ma le faia o faamanuiaga mo tagata faigaluega, lea sa taua e faapea o ia e faia laisene o faamanuiaga tai $20 tala ma faavasega poo ai e tatau ona ave i ai le faamanuiaga. E tusa ma le $4,200 se vaega tupe e lei mafai ona toe totogi atu e Morinda i le kamupani, e ui na ia faaalia i le taimi o suesuega o molimau i le tausaga ua mavae, o le a taumafai i ai. E toatele tagata faigaluega na le mafai ona maua lea faamanuiaga tau tupe ona o le faaletonu na tulai mai, lea na iu lava ina oo i leoleo ma faia ai suesuega ma molia le tamaitai.
I le saunoaga a le faamasino sinia na ia taua ai, o soo se tagata e tauaveina se tofiga sinia i se galuega e lote ai seleni, e tatau ona ia manatu i le faatuatuaga ua avatu ia te ia, peitai e le o o le tulaga lea na aliali mai ina ua tupu le faaletonu i seleni a tagata faigaluega ua le maua. O se faailoga lea e manino ai ua na le faautagaia le faatuatuaga poo le trust o le kamupani na avatu ia te ia. O le tasi itu matuia o le solitulafono a Morinda, ona e lei iai lava sana taumafaiga e toe totogi le tupe e $4,200. Mo sona lelei, ua faataua e le faamasinoga lona faatoa tulai lea i se soligatulafono ma ua toesea ai le 3 masina o lona faasalaga e 12 masina i le falepuipui. E iva masina ua nofosala ai o ia i le toese i Tafaigata.
E $37,881.30 le tupe a le ofisa malaga na gaoi
O se tasi tamaitai ua faasalaina i le falepuipui o Lynn Ah Sang, na ioe i ona moliaga e 36 o le gaoi a o galue i le ofisa malaga o le Lesina Travel. O tupe uma na aafia na faaalia e faapea o seleni o pasese ma talosaga a tagata mo ni visa, ma talosaga nofomau i Niu Sila. Taua i tolaulauga a le faamasinoga, sa mafai ona tupu le faaletonu ma suesueina e leoleo ina ua iloa e iai ni faamaumauga sese o tupe a le ofisa malaga na faia e le ua molia. O le va o le masina o Aukuso 2007 e oo i le amataga o le tausaga ua mavae 2008 na faatino ai le solitulafono, ae o le masina o Fepuari o le tausaga lava na tea nei na faatoa maua ai le mea ua tupu.
Sa muamua tetee le tamaitai o Lynn ina ua tulai i le faamasinoga, ae na toe suia lana tetee i le ioe i moliaga uma e 36 ina ua sauni le faamasinoga e suesueina molimau o le mataupu i le aso 9 o Tesema o le tausaga e 2008. Na amata le faasalaga a le faamasinoga i le 3 tausaga, peitai na toesea isi masina ona o lona ioeina o le solitulafono, ma o le faatoa tulai lea i le faamasinoga i se moliaga faasolitulafono. E 2 tausaga ma masina e 3 ua faasalaina ai o ia i le falepuipui.
