Ua faamatalaina e le afioga ile faamasino le susuga Leiataualesa Daryl Clarke le solitulafono na ave faamalosi ai e ni alii se ave taavale laupasese 64 tausaga le matua o se gaioiga matuia tele.
O le alii o Mu Fualau ma lona uso o Sui Fualau, faapea Roman Luamanu ma Magia La’iva ua faasalaina i le falepuipui ona o lea solitulafono. O le amataga o le tausaga nei i Malifa na taofi ai e ia taulele’a talavou le taxi ma agai ai i Vaoala. O le taunuu o le taavale na faia ai ei latou se gaioiga na latou ave ai le ave taavale matua ua loka i tua o le keli ae fai ai lo latou ivi i le taavale ua feoa’i ai ile po atoa. Sa latou faaaoga foi tupe o le taavale e faatau ai a latou fagupia ma sikaleti. O Toamua na maua iai le taavale o loo tu ai ae o loo loka lava i tua le ave taavale matua. O se tagata na agai ane ile nofoaga sa tu ai le taxi na ia lavea’ina le ave taavale.
O le matuia tele o le solitulafono na faaalia e le faamasino sa avea le sosola oi latou ile taxi laupasese ma tulaga sa lamatia ai le saogalemu o isi taavale ma tagata feoai i le po na alu ai le solaaga ai latou aua sa onana. O Mu Fualau e iva masina lona faasalaga, ae o Sui Fualau ma Magia La’iva e ta’i valu masina. O le taitai o le to’afa sa sili ona ogaoga lana gaioiga na fai o le alii o Roman Luamanu e tasi le tausaga ma masina e lima lona faasalaga i le falepuipui. O faasalaga ua faia iai latou o se feau lea e momoli atu iai latou o faamoemoe e faia lea solitulafono. O lona uiga o le feau taua a le faamasinoga e matua leai leai lava se avanoa mo se tasi poo nisi e faia lea ituaiga o soligatulafono o lona taunuuga o le falepuipui.
Fai mai le faamasino o se gaioiga e faia e se tagata pala’ai na faia e Mu, Sui, Magia ma Roman.
O le talavou oo latou tausaga o se isi lea tulaga ogaoga ile vaaia a le faamasinoga aua o tausaga ia o le olaga e faaaoga lelei ise galuega e tausi ai matua ma le aiga ae maua ai foi seleni e faatino ai manaoga o le olaga i aso uma.
O se isi itu ogaoga o le faaoolima oi latou ile ave taavale lea na mafai ai ona latou tuu le ave taavale i tua o le keli ae sosola ile taxi ma faaaoga tupe e faatau ai a latou pia ma sikaleti. Sa nofo taofia i latou ile vaaiga a leoleo ao talia taualumaga a le faamasinoga ma le faaiuga na lau i le aso Faraile ua mavae.
