Ua savalia le lua masina talu ona amata faamamalu e le pulega o le faalapotopotoga o le malosi faaeletise se faaiuga ua faia e le malo e ala i le Kapeneta, ua le toe totogia ai e aiga ma tagata taitoatasi le tau o le laina eletise e toso i se laoa ma se maota e mamao ese ma le laina autu o loo maua atu ai le eletise.
O le tasi lea o to‘a sa feagai ma le atunuu i le tele o tausaga ua mavae, ma tuai ai ona maua e aiga lea auaunaga. Ua faaalia e se ofisa sinia o le vaega o loo faasoasoaina le eletise i le faalapotopotoga o le malosi tau eletise le susuga Fale Te‘o, talu ona faia le suiga e le Malo ua siitia le numera o aiga ua talosaga mo le faaolaina o o latou laoa ma maota ina ua mae‘a ona pasi le uaeaina e se faieletise ua iai le pemita ma le laisene faataga.
“O aso ua mavae sa fai ma avega mamafa i nai aiga le totogi o pou moli e fai faato‘ā oo i lo latou fale, a o le taimi lenei e na o le $200 tala ma ona tupu e totogi mai mo le faaolaina o le eletise pau lea o le tupe e manaomia e le matou auaunaga”.
O le finagalo lea o le alii ofisa ina ua fesiligia. Fai mai le susuga Fale, o aso foi ua mavae sa tele ina le gafatia e aiga le totogi o le tosoina o se laina ma talosaga atu lea e fia maua se tau feololo, ma o se faiga lea sa fetuunai ona faato‘ā maua ai lea e sea aiga le eletise.
O le afioga i le Palemia, Susuga Tuilaepa L Sailele Malielegaoi, sa ia faailoa i se taimi o le tausaga nei le faia o le faaiuga a le Malo e le toe totogia le tosoina o laina eletise mo le maua e aiga o lea auaunaga, ma o se faaiuga ua faia ina ia mautinoa e maua uma e tagata le eletise.
Faaalia e le alii ofisa o le EPC, o lana matau i ai pe na o le 15 pasene o aiga i le atunuu e lei oo i ai se eletise ona o le tau mamao o laina a le EPC, ma o se isi lea galuega o loo feagai ma le faalapotopotoga, o le faataoto o laina ia oo i vaega uma o le atunuu e tatau ona maua lea faamanuiaga.
O le cash power poo le eletise e totogi muamua, o se isi lea galuega o loo feagai ma le vaega o loo faasoasoaina le eletise, le distribution section o le malosi tau eletise le EPC, ma ua faaalia e le alii ofisa o Upolu lava ia, o le 85 pasene ua faaaoga le eletise e totogi muamua, ae na o le 15 pasene o loo fua pea le pili ona faato‘ā totogi lea.
O Savaii ua na o le 50 pasene o loo faaaogaina le cash power, ae o le isi lima sefulu pasene o loo totogi lava pili pe a mae‘a ona fua le mita.
Ua iai le fuafuaga a le faalapotopotoga e tatau ona oo atu i le tausaga fou ua faasopolia uma le atunuu i le cash power.
O se vaega tele o aiga o le afioaga o Magiagi o loo mu fua pea i le eletise, ma ua faaalia e Fale o loo faia pea le galuega o le taumafai e faaoo atu le cash power i lea nuu ae o le a iai se suiga o lea faafitauli pe a oo ina siitia uma afi o loo i Tanugamanono i le nofoaga fou i Fiaga, lea o loo fausia ai se afi eletise fou.