“Topule le tamā e faaui atu lana ‘ula i lona atalii”

O le viiga ma le faafetai i le Atua soifua mai le agaga faagaeetia ina ua mafai ona faataunuuina se sauniga faapitoa a le ekalesia Living Waters Christian Church (Vai o le Ola) i Otara, Aukilani, i le taeao o le Aso Sa na tea nei, aso 8 o Tesema.
O se sauniga sa tuuina aloaia ai e le susuga i le faafeagaiga ia Solomona Chand ma lona faletua ia Sola, le taitaiina o le galuega poo le tulaga o le Senior Pastors i ē sa fai ma faifeau fesoasoani o lea lava ekalesia, le susuga ia Erosita Pulepule ma le faletua ia Leone.

 
O Pastors Solomona ma Sola Chand, ua 13 nei tausaga talu ona la faatūina ma taitaiina le ekalesia, na mafua ona o se faaaliga (vision) mai le Atua ina ia tusia igoa o soo se tagata o le lalolagi i le Tusi o le Ola.
I totonu la o le 13 tausaga talu ona faavaeina le ekalesia, o le tele lava o taimi e faimalaga ai Pastor Solomona e lē gata i atunuu i fafo a o i totonu lava o Niu Sila auā le tala‘iina o le Tala Lelei poo le faatinoina o le galuega faaevagelia.
E ui lava la ina fiafia le faafeagaiga i le avea ai o ia ma taitai o le lafu mamoe, ae o lona loto lava o le tala‘iina o le Tala Lelei i agaga o leiloloa i le lalolagi, ma lona talitonuga, o le aogā o le aulotu poo le ekalesia o le tapueina lea ma le faafaileleina lea o agaga ina ia a‘otauina ma malolosi auā le o atu e tala‘i le Tala Lelei e pei ona faatonuina ai e Iesu le ausoo, “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia.” (Mataio 28:19)

 
O le mafuaaga tonu foi lea ua finagalo malie ai Pastor Solomona ina ia tuuina atu le galuega i se tasi auā le leoleoina o le lafu mamoe ma le faagaioina o polokalame a le ekalesia ae se‘i tuu atoa lona malosi i le faatinoina o lana ia meaalofa ma lona valaauina mai le Atua, o le galuega faaevagelia lea.
O le susuga ia Erosita ma le faletua ua 12 nei tausaga o galulue i lenei ekalesia, 7 tausaga o avea ma faifeau lagolago. Ua mālie ai le saunoaga a le taitai o le sauniga, “O le asō, ua topule ai le tamā e faaui atu lana ula i lona atalii.”
O le sauniga la e pei ona faatinoina i le Aso Sa na seia mavae atu nei, sa taitaiina e le Susuga i le Taitai Aoao o le Ekalesia Faapotopotoga a le Atua i Niu Sila (General Superintendent of the Assemblies of God in NZ), Pastor Iliafi Esera.
O se faamoemoe matagofie ma le faamanuiaina e lē gata i le faafoeina e le susuga ia Pastor Iliafi o le sauniga, a o le auai foi o sui o le Komiti o le matagaluega Samoa a le Assemblies of God, faapea ma nisi o faafeagaiga ma o latou faletua, aemaise foi o aiga ma uo o le susuga ia Solomona ma le faletua faatasi ai ma aiga ma uo a le susuga ia Erosita ma le faletua.

 
Ia faamanuia tele le Atua i fuafuaga uma a le Ekalesia Living Waters Christian Church: i le susuga i le faafeagaiga ia Erosita ma le faletua ia Leone auā lo la tulai mai e tauave le galuega a le Atua, aemaise ai foi le alo atu o le susuga ia Solomona ma le faletua ia Sola i le faatinoina o le galuega faaevagelia. Ia tele ni agaga e faaolaina ma tusia o latou igoa i le Tusi o le Ola e lē gata i totonu o le ekalesia a ia oo atu foi i soo se atunuu o le lalolagi atoa.
Pastors Solomona & Sola ma o la alo o Anton, Salina & Faith Taitai o le sauniga Pastor Iliafi Esera Tofa iaTufue Sa'u ma nisi o ona grandchildren fa'atasi ai ma lona alo ulumatua, le faletua ia Pastor Sola Chand Failautusi Aoao o le Assemblies of God i Niu Sila, Pastor Shona Sorensen ma lana tane, Pastor Lionel Sorensen Susuga i le perofeta Pastor Les Dowie o loo saunoa apoapoai i le faafeagaiga fou ma lona aiga