Ua faatuina nei le lala fou o le Toomaga mo ē Puapuagatia i Aukilani ona o le toatele o i latou o loo fia ofoina atu le fesoasoani mo le Toomaga i Samoa. O le sini autu o lenei faamoemoe o le faia lea o ni sailiga tupe e fesoasoani atu ai i le faatinoina o galuega a le Toomaga mo ē Puapuagatia.
O loo iai foi ma le naunautaiga i ni polokalame faailoa auā lava le taofia o sauaga. Ua tele alo ma fanau o loo tausia e le Toomaga mo ē Puapuagatia i Samoa, ona o sauaga faaletino, faalemafaufau, feusuaiga faamalosi, faapea foi ma le tele o tina ua sauaina i totonu o aiga ma sulufai atu mo se puipuiga ma le saogalemu.
Ua silia i le 100 le mamalu o le atunuu ua iai i totonu o le mafutaga. O nisi, o aufaigaluega a le Atua ma faletua, mamalu i tamalii ma failauga, faletua ma tausi aemaise alo ma fanau o le atunuu o ē na fananau ma soifua i Niu Sila nei. Ua iai i latou le agaga o le fia ofoina atu o le fesoasoani i le atunuu e ala i le lagolagoinia o le Toomaga mo ē Puapuagatia i Samoa.
O nisi ua ofoina mai lo latou taimi ma le tomai e fesoasoani ai i tagata puapuagatia i totonu o si o tatou atunuu pele o Samoa. E iai le naunautaiga ia maua se mafutaga vavalalata ma le Toomaga i Samoa ma malamalama ma mataitū vaega tonu e aogā i ai le fesoasoani e pei ona galulue agai i ai lenei faamoemoe.
O loo iai le fuafuaga mo ni sui o lenei faalapotopotoga e malaga atu i le Mass Media Fundraising Campaign i Samoa mo le Aso Faraile, 30 o Me 2014, e fesoasoani mo lea aso faapitoa.
O le komiti faafoe mo le Toomaga mo ē Puapuagatia – Aukilani:
Taitaifono: Talialoa Filipo Tipoa‘i
Faatonu: Peseta Pei Leva Aati-Schuster
O ia tamalii o le atunuu ua silia i le 20 tausaga o auauna ma faatino polokalame i le taofia o sauaga mo le community Samoa i Niu Sila, aemaise Aukilani, e ala i polokalame faatulagaina a le Matagaluega o Faamasinoga, Ekalesia, faalapotopotoga, aoga, matatā eseese, faapea tv ma leitio Samoa.)
Sui Faatonu: Leilani Jackson
Failautusi: Peti Tanielu-Malifa ma Maria Kupa-David
Teutupe: Peter Parsons ma Catherine Tito
