O le vaiaso talu ai ua tolu i ai vaiaso o faaitiitia le oloa taumafa tuuaisa o le vaemoa, tauau moa ma le tauau pipi i Samoa, ma ua pei e valelea le au fiafia i le vaemoa ona pau lea o le taumafa tuuaisa taugofie ina ua agai atu i faleoloa ua lē maua.
Sa pei o se mea mālie i le tumutumu o faatauga o taumafa o le Aso Sa, ona ua lē toe faalogoina le aumai ni pauna vaemoa se sefulu fia, ae ua na o le valuvalu o le ao ma silasila i aano o manufasi e pei o povi, ma mamoe pe ave ona o le taugata.
O nisi lava o aiga e vaivai le seleni na tua i le apa eleni poo le pilitati e ui ua maua i nei aso i le $3 ma le $4 tala i le apa eleni i nisi faleoloa.
O ni tetee a tagata faigaluega i luga o uafu i Amerika o loo sau ai le vaemoa mo Samoa le mafuaaga ua ta‘ua ua tuai mai ai ni vaaoloa. Peitai sa iai le vaa lauoloa i le amataga o le vaiaso na tea nei lea na aumai ai se uta o vaemoa ma tauau pipi, tauau moa ma fatu moa.
Ua fai pea ma talasua i nei aso i le atunuu, le o atu i faleoloa ua leai lava se totoga o le moa e lē faatauina ai, ona o le fiafia tele i ai o tagata mo meataumafa. Ua na o le pipi la ua lē toe faatauina lona siusiu ona ua faasā, ae ua na o lona tauau ma ona vae faapea pipi atoatoa.
O Amerika Samoa lea ua aumai ai faamomoli o nai pusa siusiu pipi. O le taumafa tuuaisa o le mamoe ua sili ona taugata, ma o aso nei i Samoa a tausami ai se aiga o le aiga sili lea ona malosi le seleni auā ua lata i le sefulu tala le tau o le pauna mamoe ua iai nei.
