O le lē lelei o auala o puipuiga mai le tagofia ma le gaseseina o taumafa o le mafuaaga, lea o loo talitonu le alii fomai le tofa Leausa Take Naseri, ua maualuga ai le numera o tagata i le atunuu ua aafia i le gasegase o le fiva taifoi.
Talu mai Aperila o le tausaga nei, e oo mai ia Iulai ua faamauina ua selau ma ona tupu gasegase o le fiva taifoi i le atunuu, ma o se aofaiga e fua i le siitia o tagata e maua i le masina e tasi lea e oo lava i le to‘a sefulu.
O le numera lea e aofia ai ma le to‘a sefulu o le au nofosala i le falepuipui i Tafaigata na aafia i le fiva taifoi, lea ua faaalia e le alii fomai ua saogalemu nei vaega uma o loo saunia ai taumafa i le falepuipui faapea foi ma le suavai aemaise o potu o loo faamautu ai le au nofosala. Ua mae‘a ona fautuaina e le soifua maloloina le matagaluega o leoleo ma falepuipui i ni auala o puipuiga e taofia ai le toe pipisi o le taifoi i le toese.
O le tasi lea o fautuaga ua lafo i le Komesina ma le matagaluega o le fausia o se faiga faavae e avanoa ai ona suesueina lelei tagata e faasalaina i le falepuipui mai le tolu i le ono masina, ina ia mautinoa o loo atoatoa le soifua maloloina a o lei amata tuli le faasalaga, auā afai o se tasi o loo aafia i le taifoi poo isi faama‘i pipisi, o le auala pito vave lava lea e sao atu ai faama‘i i le nofoaga ma pesia atu ai ma isi.
O loo faatalatalanoa foi e le matagaluega o le soifua maloloina ni auala e puipuia lelei ai le tagofia o soo se taumafa e amata mai i faleoloa tetele ma faleoloa laitia o loo faatau ai faapea faleaiga i soo se vaega o le atunuu aemaise o faleaiga BBQ ma isi ituaiga o pisinisi laiti o loo faatau ai taumafa e pei o salati fualaau ‘aina suamalie o loo vaaia i polotito o faleoloa, o faleaiga faapapa ma isi lava taumafa o loo faatau savali i totonu o nuu ma afioaga.
O loo silasila le matagaluega e faia ni aiaiga lelei ina ia mautinoa o loo mamā ma saogalemu ia taumafa mo le faaaogāina e le lautele o tagata.
