Tolu masina e tala ese ai fale, ma aveese le tuugamau

E tolu masina ua ave i le tina o Tuutasia Savelio Namulauulu e tala ese ai o latou fale ma lana fanau ma lona aiga, faapea isi aiga na auala atu i le tina ma lona toalua ua maliu, ma o ese loa ma le fanua e tusa ma le lima eka sa faamautu ai i Vailele-uta.
O le tolu masina foi lea ua ave i le tina e eli ese ai le tuugamau ma liutofaga lona toalua na maliu ma teu ai i le fanua i le masina o Ianuari o le tausaga e 2011.
O le faaiuga lea a le faamasinoga maualuga ina ua tuuina atu e le Loia sili a le Malo e avea ai ma sui o le Malo o Samoa se talosaga i le faamasinoga e faatulai ese ai nei tagata ma eleele o le Malo, sa latou nofoia talu mai le tausaga e 1990.
I le faaiuga tusitusia sa faaalia ai e le tina o Tuutasia, o lona toalua sa tuli sona faasalaga i le Ao o le Malo ua tuumalo i le tausaga lea, ma faia ai le faatonuga a le Ao o le Malo i lea taimi e faasee atu lona toalua ma lo latou aiga e faamautu i lona fanua i Vailele.
Peitai o le tausaga e 1994 na liliu atu ai le fanua i lalo o se meatotino a le NPF, ma faapea ona talosaga ai le toalua o le tina i le pule o le NPF i lea taimi ma faaauau ai pea ona latou nofoia le eleele.
O le tausaga e 2007 na liliu atu ai e le NPF le eleele ma avea o se meatotino a le Malo ma faapea ai loa ona faia feutanaiga ma le toalua o le tina a o lei maliu ina ia taofia le toe faia o se isi mea i luga o le fanua ma ia faasee ese.
Ina ua maliu le tamā o le aiga i le amataga o le tausaga e 2011, na ave le faatonuga faaletulafono i le tina ma lona aiga e taofia ai le eliina o se tuugamau, peitai e lei usitaia.
O loo taoto nei i le faamsinoga le isi lea o mataupu, o le moliaga o le lē usitaia o le faatonuga a le faamasinoga e taofi le teuina o lē ua maliu i luga o le eleele.