O le vaiaso na se‘i faatoa mavae atu nei, o se vaiaso tāua tele ma lē mafaagaloina mo le auaiga o Moeono-Kolio, a o latou seleseleina i le Aso Faraile, aso 10 o Me 2013, faamanuiaga o ni galuega fita ma le tele o faataulaga sa fai mai, ina ua faauuina faatasi uma le Tamā, Tina, ma le afafine, mai le Iunivesite a Aukilani.
O se sauniga tele a le iunivesite na faia i le Aotea Centre i Aukilani, lea na faauu mai ai le tamā, le susuga i le faafeagaiga, Rev. Deacon Tomanogi Sapati Moeono-Kolio, o lona faletua, le tina ia Malia Moeono-Kolio, ma lo la alo le tamaitai o Mary Gafaomalietoa Sapati Moeono-Kolio.
O Reverend Tomanogi Sapati, a se Tiakono o le Ekalesia Katoliko, lea na faauuina mai lona faailoga o le Bachelor of Theology, double major i le Biblical Studies and Christian Thought & History (Church History).
O lona faletua ia Malia, o le faatonu o le Auckland Diocese’ Catholic Social Services, na faauu mai lona faailoga o le Bachelor of Social Work (graduating with Honours). Ae o lo la alo le tamaitai o Mary, sa faauu i le tausaga talu ai i lona Bachelor of Arts, ae o le tausaga nei na tauaao atu i ai le faailoga Bachelor of Arts Honours degree in Criminology.
O taui nei tatau ma onomea mo le tagata e galue faamaoni i sini ma moemitiga na faatulaga, peitai mo le aiga o Moeono-Kolio, na latou faafoi uma le viiga ma le faafetai i le Atua, o Ia lava na foai maia nei faamanuiaga mo le aiga. Ma o lagona tonu na sa iai i le afiafi o le aso lava lea, Aso Faraile, a o potopoto fiafia le aiga lautele faatasi ma uo aumea mamae e faamanatu lenei aso fiafia.
