O le aso a taeao e tulai ai i luma o le faamasinoga se alii leoleo sinia i le maea ai o le faafa ona tolopo tuuaiga o faiga faasotoma ma le faiaiga faamalosi ua faia faasaga ia te ia. O lea leoleo sinia na ia vaaia le nofoaga mo tupulaga talavou ua solitulafono, le Olomanu i Mulifanua.
O moliaga nei ua faia faasaga ia te ia e se alii talavou (faafafine) sa taofia ai i le Olomanu.
O le faaiuga o le lua tausaga talu ai na muai tulai mai ai lenei mataupu ae o le toe tolopo ai mai i le vaiaso ua tea ona ua see ese Faamasino na tuu atu i ai le mataupu na te iloiloina.
Faailoa mai e le Afioga Tauiliili Harry Schuster ina ua toe valaau le mataupu i le vaiaso ua tea, o lona uso o loo tulai o se loia mo le alii leoleo sinia. O le mafuaaga lea o le faamaamulu ese ona o le fesootaiga faaleaiga lea.
Ua talia nei le Afioga Vaepule Vaemoa Vaai poo le alii faamasino papalagi fou lea ua amata galue i Samoa ina ia faatautaia lenei mataupu.
O le tolo soo o lenei mataupu na taua ai e le alii e ana le tagi e le faigofie.
O fuafuaga e tuua le atunuu e agai i lona tina na taua e lenei alii talavou ua na o le tolopo lava ona o le talia o lenei mataupu.
O Falealili e sau ai lenei alii ae o lona tina e faamautu lava i Ausetalia. O loo nofo nei i matua o lona tina e faatalitali ai le faamasinoga. O le mau a leoleo o loo faagasolo taualumaga o le faamasinoga i le tulaga e tatau ona iai.
O le taumafai foi o lenei alii e malaga i fafo e faigata aua o se alii ua faamaonia nisi o solitulafono faasaga ia te ia.
O le mafuaaga lava lea o le oo i le Olomanu toe agai i Tafaigata ma tulai mai ai loa le tagi lenei faasaga i le leoleo sinia ona o ia solitulafono.
O le taimi na tulai mai ai nei moliaga o le faiaiga faamalosi ma le fai o faiga faasotoma na faamalolo ai mai ona tofiga ae talia ai le tulaga e oo i ai ia moliaga.
O le toatolu ai lenei o leoleo ua tulai i luma o le Faamasinoga ona o tuuaiga nei. O soligatulafono uma ua tulai ai nei alii e aafia ai sauaga mataga.
O le isi alii leoleo ua faamalolo foi e talia le tali atu i moliaga o le taumafai e fai se faigaaiga mataga i se tamaitai leoleo.
O le isi ua teena se osofaiga ua tuuaia ai e se tamaitai e 40 tausaga o le faaoolima ma le tosoteine.
