Ua fai nei se faatonuga a le Faamasinoga Maualuga ina ia toe tolopo atu i le masina o Mati i le tausaga fou le mataupu faasaga i se alii talavou ua tuua‘ia i sauaga tau feusuaiga ma le lafo o nei sauaga i luga o le telefoni i le polokalame o le You Tube.
Ua leva le ata ae o lea faatoa tulai le alii lenei i lenei vaiaso i luma o le Faamasinoga. O le ata o loo faasolo lava le matamata ai o le toatele ona ua tatala faasolo atoa i luga o le You –tube. O le alii lenei sa aoga i le Iunivesite Aoao o Samoa ma e lē o iloa pe o faaauau lava ona aoga ae o le isi faamatalaga na oo mai, ua galue o se avetaavale.
O le mataupu lenei ua pue ai e lenei alii i luga o le telefoni le tauanauga o se tamaitai talavou e talai ona lavalava. Na umi finauga ma e tagi lava le tamaitai ae o loo pue lava e le alii lenei lona ata. Na iu lava ina leai uma ni lavalava o lenei tamaitai ae o loo pue lava ma e pue atu ai lava ma le fasi e lenei alii o le tamaitai lenei. E matautia foi le tomai ua iai tupulaga o le atunuu i le tele o ituaiga ata faapea ua talafo solo i luga o telefoni ma e lē o ‘asa lava le tausaga ma le tele o nei faafitauli ua vaaia i fesootaiga nei i luga o telefoni feaveai. O le aso la ananafi na matuā toatele nisi na faapea ona faatalia le tulai o lenei alii i luma o le Faamasinoga ma e sau i le potu faamasino o loo ufiufi atoa ona foliga. O loo ua tulai mo lenei alii le ofisa loia o Vaai, Hoglund ma Tamati. O le faamatalaga a le alii Loia, o lea faatoa maua se feiloaiga ma le alii ua molia ae ua latalata nei i le masina o taofia lea alii i le vaaiga a Leoleo. O le talosaga a Alex Su‘a, ina ia tuu atu se avanoa se‘i vaavaai ai i moliaga aemaise o le tapenaga o se tali a lenei alii i tuua‘iga ua faia faasaga ia te ia.
O loo tetee lenei alii i moliaga ua faia faasaga ia te ia ae o loo iai foi le manaoga ina ia faamautu nisi moliaga faaopoopo e ono faia e le ofisa o leoleo. O le faafetai a le Ofisa o Leoleo, ua aogā foi le lafo i luga o le Youtube o lenei ata matagā ua mafai ai ona sailiili lelei e leoleo le tagata ua molia nei i lea faamasinoga.
Ua faatonuina lenei alii e matuā faasā lava ona toe ulufale i Mulivai Safata seia oo lava i le taimi e iloilo ai lea mataupu i luma o le faamasinoga lea ua tuu atu i le aso 10 o le masina o Mati o le tausaga fou.