Afai na e soifua mai i le aso 30 o Tesema o tausaga ua mavae, o le itu mautinoa o le a misia au fuafuaga e faamanatu lou aso soifua i le aso 30 o Tesema o le tausaga nei 2011.
Afai foi na e faaipoipo tonu i le aso lea, o le a lē mafai foi ona faia se lua evaga faaulugalii e faamanatu ai le aso na tuufaatasia ai oulua i le sakalameta o le faaipoipoga.
Ua faailoa mai i faamaumauga tau fuainumera faamaumauina, e 767 i latou na fananau mai i le aso 30 o le masina faaiu o le tausaga, ae 43 faaipoipoga o le a misia ia aso faamanatu tāua, ona o le suiga o aso i Samoa lea e faamamalu i le aso 29 o Tesema o le tausaga nei.
Ua pasia e le Palemene lea suiga ma o le a sui ai le tulaga o le laina o aso le dateline, ma o le a see ai Samoa Tutoatasi mai le itu i Sasae ae tu i le itu i Sisifo o le laina o aso ma tutusa ai aso ma Niu Sila ma Ausetalia.
O lona uiga o le a leai se aso 30 ae see sa‘o atu Samoa mai le Aso Tofi, 29 o Tesema 2011 i le Aso Toonai, 31 o Tesema 2011. O le a lē maua le Aso Faraile le aso 30.
E lē o mamafa tele i lagona o nisi sa fesiligia lea tulaga auā o le latou mau, e mafai ona toe faamanatu aso faailogaina o le aso 30 o Tesema pe a aulia le tausaga fou 2012.
O le latou foi tala mai, e lē o se tulaga ogaoga auā e lē aafia ai le soifua ma le ola saogalemu o tagata, ae ua latou lagolagoina le suiga o aso o le a iai.
O le atugaluga lea o le sui faipule o Faleata i Sasae na faaleo i le Palemene, ona o lona manatu alofa i tagata o loo tapena mamao ni aso soifua e faamanatu i le aso o Tesema o le tausaga nei.
O le pasia e le Palemene o le tulafono taufaaofi ua ave i ai ma le lagolago atoa a le Itu agai i le finagalo o le sui taitai o le Tautua Samoa na folasia i le maota fono, o se suiga ua manatu le Tautua Samoa e manuia ai tagata uma aemaise o atiina‘e a le Malo.
E lē gata ina misia le aso 30 o Tesema 2011 mo aso fanau ma faaipoipoga faamanatu, ae o tina maitaga o le a tau le taimi e ola ai pe fanau i lana pepe i le aso 30 o Tesema o le tausaga nei.
Na faaalia e se tamaitai fomai, e masani lava ona sa‘o le tauina o aso e ola ai ni maitaga o nai tina, ae iai lava foi maitaga e tea lava le aso na fuafua e ola ai, e lei fanau ma e tele lava mafuaaga.
O nisi o vaega o le a lē mafai ona faamanatu i le masina o Tesema o le 2011 i lona aso 30, o aso na maliliu ai nisi lea e masani ona faia ai talaga teu pe faapipii ai le maa e faamanatu ai lē ua maliu.
O maliu e tupu i le vaitaimi lea ae faamoemoe e teu ma faia sauniga mulimuli i le aso 30, o le a tuusa‘o lava i le aso 31.
E faapena foi faaipoipoga a ekalesia e faamamalu le Sapati i le Aso Toonai, o le a fuafua e faatino i aso o le vaiaso mulimuli o Tesema 2011 a o lei oo i le vaeluaga o le Aso Tofi, 29 e suia ai le aso, ina ia mae‘a ane le faaipoipoga ae fetaui ma le Sapati i le Aso Toonai, 31 o Tesema 2011.
O nisi o faamoemoega faapea ua mafua ai ona faanatinati e le Malo ona pasia le tulafono e suia ai aso, ina ia lava tapena tagata, ma ia lava ai foi tapenaga mo pisinisi e pei o kamupani vaalele ma ofisa malaga, faapea le tusiga o oloa ma le okaina o soo se oloa mai fafo aemaise o oloa mai Samoa e faatau i Niu Sila ma Ausetalia ma nisi o atunuu Asia.
