Ua le toe po se lilo i le iuga o le taaloga a le Manu Samoa ma Tonga i Suva i le Aso Toonai na tea nei, na faiaina le Manu i le Ikale Tahi 28-18. Ua foi ai Samoa mai le PNC i Suva e faiaina uma taaloga e lua.
O loo loma le taaloga a Fiti ma Tonga ae e lei faia lea taaloga ae ua maninio o Fiti e manumalo i le taamilosaga ina ua toilalo ai Georgia ia Fiti i le Aso Toonai 15-37.
Ua fai ma masani le faiaina o le Manu ia Tonga. Ua sosoo ai tausaga o toilalo le Manu Samoa.
Ae le gata i lea, ua leva e lei toe maua se malo o le Manu Samoa. Ae mo le taimi nei ma le faamoemoe o loo loma, o le saili lea o se avanoa mo le Ipu o le Lalolagi i le 2019, o loo taumafai pea le SRU e saili se ‘au lelei a Samoa.
Na malosi Tonga i le afa muamua o le taaloga, e lua sikoa i le afa muamua ma o ‘ai ina ua ta le malologa e 17-6.
E na’o sala e lua na aa e Ah See Tuala na maua ai ‘ai o le Manu Samoa. I le afa lona lua na toe faaopoopo le malosi o Tonga na maua isi sikoa ma oo atu ai ‘ai i le 28-6 a le Manu.
Ona faatoa tali ai lea o le Manu i le minute 75 o le taaloga i le sikoa a Ed Fidow ae ua uma le taimi. Toe maua ma le isi sikoa a Matavao i le 80 minute o le taaloga ae ua faiaina lava le ‘au.
Ae o le faaletonu o Tonga i le sala soo na maua ai ‘ai a Samoa. E toatolu alii Tonga na tuli i tua mo le ta’i 10 minute ona o le solitulafono i totonu o le malae. E ui i lea ae na paso le Manu Samoa e tau saili le laina sikoa.
O le kuata mulimuli o le taaloga na amata ai ona taalo leaga Tonga ma amata ai foi ona faaali pepa samasama e tolu a Brendon Pickerill le laufali.
Na muamua pepa samasama Seta Sakalia i le minute 68 o le taaloga, o le taimi lea na maua ai le tatao a Ed Fidow. E lei ova le aa. Ona sosoo ai lea ma le pepa samasama a Paula Ngauamo i le pue leaga.
Ae o le tulaga malie o le taaloga, na faaauau le taaloga ova atu ma le 80 minute. A’o faaauau pea le taaloga ua pasi ma le 80 minute ua ta foi ma le logo ae toe faasala Tonga, Sitiveni Mafi. O le taimi lea na maua ai le sikoa lona lua a le Manu auala ia Melani Matavao. E lei ova foi le aa, o ‘ai o le taaloga e 18 Samoa i le 28 a Tonga.
E le o se tulaga lelei na vaaia i Suva. E matua tele naua mea sese a Samoa na fai. E foliga mai e lei iai le agavaa e tuufaatasi ai fuafuaga tatau mo le taaloga.
O Samoa na taaalo i tua ae taaalo i luma Tonga, e pei o le sikoa lona tolu na faapalasi ai e le fulupeki a le Ikale Tahi o Penikolo Latu le fulupeki a le Manu Ah See Tuala, ma fao ai ma le polo ma tamoe atu ai ma sikoa i lalo o le pou.
‘Ai o le Taaloga
Samoa 18 (Melani Matavao, Ed Fidow tries, Ah See Tuala 1 con, 2 pens)
Tonga 28 (Vuna, Latu, Lolohea tries, cons + pens)
‘Au a le Manu Samoa
1. Jordan Lay, 2. Seilala Lam, 3. Viliamu Afatia, 4. Joe Tekori, 5. Chris Vui (c), 6. Piula Faasalele, 7. TJ Ioane, 8. Jack Lam, 9. Dwayne Polataivao, 10. Tusi Pisi, 11. Sinoti Sinoti, 12. Alapati Leiua, 13. Alofa Alofa, 14. Paul Perez, 15. Ah See Tuala. Replacements: 16. Elia Elia, 17. James Lay, 18. Paul Alo-Emile, 19. Brandon Nansen, 20. Ofisa Treviranus, 21. Melani Matavao, 22. Rodney Iona, 23. Ed Fidow.
