Ua alualu nei taualumaga o le moliaga o le fasioti tagata faamoemoeina faasaga i se tasi o tamalii sa avea ma leoleo o le Malo, o Tiumalumanaia Filipo Langkilde, ua taunuu i le faaui i tua e loia a le Malo o lea moliaga, ae suia i le moliaga o le fasioti tagata paivalea poo le manslaughter. Na faaleaogaina uma taulaumaga muamua o lenei mataupu, ina ua faailoa e le alii faamasino sa tauaveina muamua le mataupu e iai lona sootaga i le na maliu i le faalavelave, o ia lea o Peti Gaee, o Vaimoso-Uta. Na faia ai le faaiuga e faaleaoga atoa suesuega (mistrial) ma faatonuina ai le ave o le mataupu i le faamasino sili, ma filifilia se isi laulau o faatonu fou e suesueina molimau.
Sa toe fofogaina le mataupu i le Aso Gafua, 13 o Iulai 2009, peitai e lei faataunuuina le valaauina o molimau a leoleo i le taeao i le 10am ona sa iai nisi mataupu sa laga e loia a le Malo ma le loia a Tiumalumanaia Filipo. Na tolopo ai loa iloiloga i le 2 i le aoauli o le aso lava lea, ma faapea ona faailoa ai e le itu a leoleo e faaui i tua le moliaga o le fasioti tagata faamoemoeina, ae suia i le fasioti tagata paivalea. O le suiga lea na ioeina ai loa e le ua molia le moliaga ma le taunuu ai le valaauina o molimau a le itu tagi, ae ua taatia atu i le aso 27 o Iulai 2009 e fofogaina ai folasaga faaiu a loia, ma silasila le faamasinoga i le lipoti a le ofisa faanofo vaavaaia le Probation office.
Na faaalia e le alii loia a le Malo o Leslie Petaia, ua mafua ona faia le suiga o le moliaga, ona ua le mafai e le tamaitai sa nonofo ma le ua molia, ona oo atu e faia lana molimau. O aiaiga o le tulafono e le mafai e leoleo ona faamalosia se tasi e iai sona sootaga i se ua molia e faia sana molimau, aemaise o lea tamaitai o le toalua faaletulafono o le ua molia, peitai ua nofo eseese po ua separate. O lona loto malie lava e mafai ai ona molimau, ae a leai e le faamalosia. O le molimau autu lea a leoleo sa faamoemoe e lagolago ai le moliaga o le fasioti tagata faamoemoeina, aua o faamaumauga a leoleo i le faalavelave na tulai mai i le masina o Iuni 2008 i Elise-Fou, o loo faaalia ai ua na o le tamaitai sa iai i le fale i le taimi na osofai ai e le ua molia le ua maliu i se agaese.
O Tiumalumanaia Filipo Langkilde, o loo iai nisi moliaga sa molia muamua ai, ina ua tuanai tausaga sa galue ai i le matagaluega o leoleo, e pei o le faaoolima ma le umia o se aupega malosi. O ia moliaga e mafua i se isi mataupu e ese mai i le faalavelave na tupu na maliu ai Peti Gaee o se tasi sa galue i le Faalapotopotoga o Inisiua a le Malo.