O le tamaitai faamasino ia Tafaoimalo Leilani Tuala Warren, na ia fofogaina le iuga o le alii solitulafono

O le tamaitai faamasino ia Tafaoimalo Leilani Tuala Warren, na ia fofogaina le iuga o le alii solitulafono

Ua tatala le masina muamua o le tausaga fou 2019 i le faasalaga faafalepuipui e 21 tausaga ua faia e le tamaitai faamasino le afioga Tafaoimalo Leilani Tuala Warren, i le alii o Philip Cowley o Faleu Manono, Leauvaa, ma Talimatau, ina ua faamaonia ona moliaga e lua o le faamalosi o se teineititi e 8 tausaga le matua.

E 27 tausaga le matua o Phillip, ma o le faaiuga o iloiloga o molimau a leoleo e se laulau o faatonu na maua ai ma le faaiuga.

O le aso 12 o Novema o le tausaga ua mavae 2018 na faagasolo ai suesuega a le faamasinoga maualuga i moliaga, ae o le vaiaso na tea nei na faato’a lau ai le faasalaga. 

Na faaalia e le tamaitai faamasino o le gaioiga na faatino e lē ua molia e matuā lē talia lava i totonu o Samoa ma soo se atunuu ma o faasalaga e faia e le faamasinoga e matuā mamafa ina ia tala’i atu ai se feau tāua i le lautele o tagata e leai se avanoa i lalo o le tulafono e sao ai se tagata e faamaonia lona faia o ni uiga matagā e aafia ai fanau teinei laiti.

O faasalaga foi e tuuina atu e le faamasinoga o se feau leotele lea mo nisi o le a faia ia solitulafono e tasi lo latou iuga o le nofosala i le falepuipui.  O Phillip e pei ona faailoa i molimau a leoleo o le step-father o le teineititi na aafia. I le faaliliuina o lea sootaga vavalalata, o lē ua molia e lē o le tamā moni ae o le toalua o le tina moni o le teineititi na aafia i le solitulafono. E lē nofo ai le teineititi ae sa asiasi iai i le vaitaimi o le lotu tamaiti i le masina o Oketopa o le tausaga e 2017.

O le taimi foi lea na tupu faalua ai le gaioiga a lē ua molia e pei ona faailoa e leoleo, ma e tupu e lē o iai le tina moni o le teineititi o loo alu e faigaluega. O le taimi lea ua na’o Phillip ma le teineititi le fale. O le aso muamua na osofai ai e lē ua molia i ni faiga faamalosi lē na aafia, ma o le aso na sosoo ai na ia toe faia ai foi lea gaioiga matagā.

I le suesueina o lē ua molia ina ua fofogaina molimau o le mataupu sa faaalia e Philip i le faamasinoga o ia sa moe, ae na te’i ane o loo saofai le teineititi i ona tafatafa ma lona sakete mini o loo ofu ae leai se ofu vae laitiiti.

Peitai i le faaiuga a le faamasino le afioga Tafaoimalo Leilani na ia matuā teena ai lea mau a lē ua molia. Na faaalia i le faaiuga e matuā lē mafai e se teineititi e na’o le valu tausaga ona ia faia sea ituaiga o gaioiga. E manino ai ua tuua’ia e lē ua molia lē na aafia i le mafuaaga o lona faia o le solitulafono.

E lē mafai e se teineititi i sona matua e sili ona mu’amu’a le mafaufau ona iai ni ona mafaufauga faapea e pei ona faaalia e le faamasino, ma o se itu sili foi lea ona matuia i le vaai a le faamasinoga. E talitonu foi le faamasino o se isi lea ituaiga o gaioiga e tutupu i totonu o lotoifale o aiga ua lē malu ai le ola tuputupu a’e o fanau teine laiti.