“Le mafai e leoleo ona faamaonia tuua’iga o le gaoi”..Vaepule Vaemoa Va’ai
O foliga o le fiafia na molimauina i le susuga Papalii John Afele Taimalelagi ( silasila i le ata ) ina ua aumai le taunu’uga o molimau a leoleo ma ana molimau ua togi i fafo ma faaleaogaina uma moliaga e valu o le gaoi sa tu’ua’ia ai o ia, e nisi o lona aiga i suli o Malietoa Natuitasina im le afio’aga o Sapapalii i Savaii. E $16,000 se seleni sa tu’ua’ia ai o ia e le na ia fa’aulu le tagi le susuga Uale Taimalelagi, lea sa molimau ai nisi o suli o le aiga e lagolago ai le mau a leoleo. O le mataupu lenei e pei ona sa iai nisi o lipoti ua ma’ea ona fa’asalalauina e lenei nusipepa, na mafua i se teugatupe a le aiga o Malietoa Natuitasina lea sa teuina i le faletupe o le ANZ i Apia amata ile masina o Ianuari 2008, ae oo ane i le masina o Mati o le tausaga lava lea ua toe $114 tala se tinoitupe o lo’o totoe, ae leai se silafia o le aiga e ana le seleni po’o fea ua tala ma fa’aaoga iai.
O Papalii John sa teutupe i le komiti na filifilia e le aiga e gafa ma fuafuaga uma mo le faaaogaina o le tupe sa teu mo faalavelave fai ma isi fuafuaga a le aiga. O molimau na tuuina atu i le faamasinoga atoa ai ma folasaga a le itu a leoleo, na iloa ai e to’alua tagata na faamauina suafa e feagai ma le va’aiga o tupe, ae e to’atasi lava le tagata nate mafai ona saini i le talaina i tua, lea sa faatino e le na molia. O le fa’ai’uga a le alii fa’amasino o le Fa’amasinoga Fa’aitumalo (District Court) le afioga Vaepule Vaemoa Va’ai, na ia ta’ua ai le le mafai e le itu a leoleo ona fa’amaonia moliaga uma e valu e aunoa ma se masalosaloga tatau (prove beyond reasonable doubt).
Na faaalia ile faaiuga a Vaepule e faapea sa ioe le na molia i lana molimau faapea le molimau a Papalii Natu mo le itu a leoleo, sa faia se fa’amaulaloga poo se fa’ato’esega a Papalii John, peitai e lei mafai e molimau a leoleo ona fa’ailoa atu po’o le a tonu le mafua’aga o le fa’ato’esega, sei’a vagana le faapea mai o mea na tutupu na feeseesea’i nisi o suli i le faiga o itu i le fa’amasinoga o le suafa Malietoa, na mafua ai lea fa’amaulaloga. Sa ta’ua foi e le alii fa’amasino sa tatau foi i le itu a leoleo ona tuuina atu ni mau e faamaonia ai sa iai ni faiga le amiotonu i le fa’aaogaina o tupe sa teu i le teugatupe, aua ua ioe le fa’amasinoga o tupe na talaina i tua e le ua molia, sa fa’aaoga tonu e tusa o fa’alavelave ma fuafuaga a le aiga.
O le teugatupe foi a le aiga i le faletupe e le’o mafai ona tu’uina atu e leoleo se fa’amaoniga a mea o seleni na teu fuafua tonu lava i le mana’oga na ioe ma autasi iai finagalo o le aiga. O lona uiga o lea vaega o le fa’ai’uga sa tatau ona fa’ailoa ini fa’amaumauga a le faletupe, o le autu o le teugatupe e mo fa’alavelave o le aiga ma isi fuafuaga e tatau ona alu tonu iai seleni sa teu. O le ma’ea ona lauina le fa’ai’uga a le fa’amasinoga na fusi atu ai e le alii na molia lana loia ona ua manuia e la finauga, ma ua to’ilalo ai le itu tagi ma leoleo na feagai ma le finauina o moliaga o le gaoi fa’asaga ia te ia. Sa fusi atu foi e Papalii John lona faletua sa tapua’ia se taunuuga o le mataupu, o se fa’ailoga foi o le agaga faafetai ua manuia le taunuuga o le fa’amasinoga. O le na molia ma tu’uaia o loo galue ile matagaluega o Fa’amasinoga ma Mataupu tau Fa’amasinoga o se tasi o Ofisa sili lagolago o loo fa’aululu iai le lala o le matagaluega i Tuasivi i Savaii. A’o lei fofogaina le faaiuga a le afioga ile faamasino o Vaepule Vaemoa Va’ai, sa ia toe fa’ailoa i le mamalu na auai faapea le itu a leoleo ma le itu tete’e, lona fa’ailoa i le amataga o le mataupu le iai o lona sootaga fa’aleaiga i le ua molia, peitai sa talia lava e itu uma o le faamasinoga lona tauaveina o le su’esu’ega o le mataupu.
