Togi i fafo le mau tetee a le Digicel

Ua faaleaoga e le faamasinoga maualuga le talosaga a le kamupani telefoni feaveai o le Digicel, sa toe finauina ai le faaiuga a le faamasinoga o fesootaiga, le Telecommunication Tribunal na faia i le masina o Iulai o le tausaga nei.
O le iuga lea na faatonuina ai lea kamupani e toe totogi se seleni i le SamoaTel o loo faagaioia le isi kamupani telefoni o le GoMobile e mafua mai i le eseese o totogi o auaunaga tau telefoni feaveai a kamupani e lua lea e taua i le gagana Peretania o interconnection rates.
O le faaiuga foi lea na faatonuina ai le Pule Faatonu poo le Regulator e toe faia ni suiga ma ni teuteuga i le tau o ia auaunaga ina ia maua e le SamoaTel se tauvaga paleni ma le Digicel.
Peitai na tatalo lea kamupani i le Faamasinoga Maualuga mo se iloiloga faaletulafono o lea faaiuga poo se Judiciary Review, i le mau a le Digicel e solitulafono le faaiuga, ma e leai se malosiaga faaletulafono o le faamasinoga o fesootaiga na te faia ai se faaiuga e faatonuina ai ni gaioiga tau pisinisi i le va o le Digicel ma le GoMobile a le SamoaTel.
O le teena o lea finauga e le Faamasinoga Maualuga ua saga faamausali ai le iuga ua maea ona folasia e le faamasinoga o fesootaiga lea sa faatautaia e le Faamasino Sili le afioga Patu Tiavaasu‘e Falefatu Sapolu.
E toavalu loia sa auai i le toe finauina e le Digicel o lana mau e tetee atu ai i le faaiuga a le faamasinoga o fesootaiga, na faatu ina ua pasia e le Palemene i le tausaga ua mavae se tulafono e avanoa ai sea ituaiga o faamasinoga e soalaupule ai mataupu tau fesootaiga i Samoa.
E le o faailoaina i le faaiuga na fofogaina ia Iulai 2009 le aofaiga o le tupe mai interconnection rates o le a toe totogi e le Digicel i le SamoaTel.
O se seleni na taua e se ofisa sinia o le kamupani o fesootaiga a le malo o Samoa e oo i se miliona lona tuuaofaiga, e fuafua i le tau maualuga o loo totogi atu e le GoMobile a le SamoaTel i le Digicel pe a fesopoai auaunaga a telefoni feaveai.
E laititi le totogi a le GoMobile pe a sopo lana auaunaga i le Digicel, o se isi lea o vaega o le finauga. O le faia o le faaiuga a le Faamasinoga Maualuga i le talosaga apili a le Digicel o le a faaauau ai nei ona faatino poloaiga ua maea ona faataoto i le faaiuga o le faamasinoga o fesootaiga sa tauaveina e le Faamasino Sili, lea ua iai se faatonuga e toe fetuunai le totogi poo interconnection rates.
E ui ina toilalo lea finauga faaletulafono a lea kamupani telefoni feaveai, ae ua molimauina e le atunuu le tele o le sao o le Digicel i le atinae o le atunuu e le gata i taaloga, aoaoga, le soifua maloloina ma le atinae o tagata lautele.
O le faaiuga o le vaiaso ua mavae na lagolagoina ai e le Digicel se koneseti o musika sa auai nisi o tamafanau lauiloa a Samoa i Niu Sila mo le sailia o se seleni mo galuega fesoasoani o le galulolo. Sa auai nisi o alo pepese e pei o Savage, Scribe, Tevolo, ma le Yandall Sisters.